«Առաջին լրատվական»-ի հարցերին պատասխանել է tvyal.com կազմակերպության ղեկավար, տնտեսագետ Աղասի Թավադյանը
Պարոն Թավադյան, Հայաստանի ԿԲ-ն տվել է իր համաձայնությունը, ըստ որի Վարշավայի ֆոնդային բորսան ձեռք կբերի Հայաստանի ֆոնդային բորսայի բաժնետոմսերի 65,03 տոկոսը, ԿԲ-ն կպահպանի 25,02 տոկոս մասնակցություն, իսկ մնացած 9,95 տոկոսը Հայաստանի ֆոնդային բորսայի սեփական բաժնետոմսերն են: Ինչպե՞ս եք սա գգնահատում:
Հայաստանի ֆոնդային բորսան դեռ կայացած չէ: Իհարկե անհրաժեշտ են ներդրումներ: Սա որոշակի քայլ է ուղղված Հայաստանի ֆոնդային բորսայի զարգացմանը: Սա կխթանի լեհական կապիտալի ներդրմանը Հայաստանում և մեր բորսայի զարգացմանը: Բայց այս առումով դեռ վաղ է գնահատականներ տալը։
Սա որքանո՞վ պայմանավորված նաև այն տնտեսական խնդիրներով, որոնք առաջացել են ռուս-ուկրաինական պատերազմի հետևանքով: Որքանո՞վ սրանք հրատապ ֆինանսական խնդիրներ լուծելու համար են։
Չեմ կարծում՝ մեկը մյուսի հետ կապվածություն ունենա:
Առկա են կանխատեսումներ, որ դոլարի փոխարժեքն առաջիկա օրերին նորից կսկսի բարձրանալ: Որքանո՞վ են իրատեսական այդ կանխատեսումները և ինչ կարող եք ասել փոխարժեքի առումով վարվող քաղաքականության վերաբերյալ:
Այս պահին անորոշության դաշտը բավականին մեծ է, սակայն հեռատեսական է, որ հատկապես մեր արտահանողների խնդիրների լուծման նպաստելու համար Հայաստանի ԿԲ-ն կփորձի դոլարի փոխարժեքը վերադարձնել 480 դրամի մակարդակին, հենց որ մեր տնտեսության վիճակը կայունանա:
Ձեր կարծիքով մոտավորապես որքա՞ն կտևի այս անորոշության և տատանումների շրջանը:
Ես արդեն ասացի, որ այս պահին անորոշության դաշտը բավականին մեծ է և դժվար է կանխատեսել, թե քանի ամիս կտևի անորոշությունը: Դա կախված է մի շարք աշխարհատնտեսական և քաղաքական հարցերից: Համաշխարհային շուկայում բավականին մեծ գնաճ կա ոչ միայն Հայաստանում, այլ նաև ԱՄՆ-ում, Եվրոպայում, մեր հարևան բոլոր երկրներում: Դա նշանակում է, որ այս պահին դժվար է ասել, որ մոտակա շրջանում տեղի կունենա ընդհանուր աշխարհատնտեսական իրավիճակի կայունացում:
Որքանո՞վ է վերահսկելի գնաճը Հայաստանում և ինպիսին է դրա ազդեցությունը քաղաքացիների վրա:
Գնաճն պայմանավորված է նաև համաշխարհային իրավիճակով: Պետք է նշել, որ դոլարի ֆիզիկական քանակությունը 2020-ից սկսած մինչև այսօր 2 անգամ մեծացել է, և դա ամբողջ աշխարհում է այդպես: Դա նաև նրանով է պայմանավորված, որ դոլարն արժեզրկվել է ոչ միայն Հայաստանում, այլև համաշխարհային շուկայում: