Արցախի խորհրդարանի նախկին պատգամավոր, քաղաքական վերլուծաբան Վահրամ Աթանեսյանը իր «ֆեյսբուքի» էջում գրել էր․ «Արցախի ԱԺ-ն քննարկում է «Պետական պաշտոն զբաղեցնող անձանց վարձատրության մասին» օրենքում լրացումներ կատարելու նախագիծը։ Եթե այն ընդունվի, ԱԺ խմբակցության ղեկավարն այսուհետև կվարձատրվի նվազագույն աշխատավարձի 10,5-ապատիկի, քարտուղարը՝ 9,2-ապատիկի չափով։ Նվազագույն աշխատավարձը, կարծեմ, 63 հազար դրամ է։ Բռնատեղահանված հազարավոր քաղաքացիներ հասանելիք 40 և 20 հազար դրամ սոցիալական աջակցությունը ամիսներով չեն ստանում, բնակարանի վարձակալության գները երկինք են թռել, իսկ Արցախի օրենսդիրները սեփական աշխատավարձը նախարարականի հասցնելու գործի վրա են։ Համեմատեք նախարարի աշխատանքային ծանրաբեռնվածությունը՝ խորհրդարանում երկու-երեք հոգանոց խմբակցության ղեկավարի և քարտուղարի աշխատանքի հետ, և պատկերն ավելի քան զավեշտական կլինի։ Մնում է մի օրենք էլ ընդունեն նրանց ծառայողական մեքենա հատկացնելու մասին, ու ամեն ինչ տեղը կընկնի»։
Այս առնչությամբ, Արցախի Հանրապետության Ազգային ժողովի պաշտպանության, անվտանգության և օրինապահպանության հարցերի մշտական հանձնաժողովի նախագահ Սեյրան Հայրապետյանը «Առաջին լրատվական»-ի հետ զրույցում նշեց, որ իրականում օրենքի նախագիծը վերաբերում էր միայն խմբակցությունների ղեկավարներին, սակայն հեղինակը հետ է վերցրել նախագիծը լրամշակման, իսկ հետո շրջանառությունից հանվել է:
«Իսկ այսօրվա Արցախի ԱԺ նիստում պետք է ընդունվի օրենք, որը թոշակներին է վերաբերում, ժողովրդամետ նախագիծ է: Ուղղակի շփոթել են, որ նույն օրենքի մեջ նույն անվանումով փոփոխություն է մտցվում, սակայն դա վերաբերում է մեր ժողովրդի թոշակներին: Ոչ թե թոշակներն ավելացվում են, այլ օրենսդրական կարգավորում է արվում: Արտառոց բան չկա, սովորական փոփոխություն է»,-ասաց նա:
Սեյրան Հայրապետյանն աննպատակահարմար համարեց պատգամավորների աշխատավարձի բարձրացման հարցի քննարկումն այս պահին. «Ըստ իս առաջին հերթին պետք է վարձատրության բարձրացում ունենան մեր սահմանը պահողները, մանկավարժները, նաև սովորական քաղաքացիները: Մենք այդ քաղաքականությունն ենք փորձում առաջ տանել ու դեռ շատ անելիքներ ունենք:
Պատերազմից հետո ունենք ստեղծված ծանր վիճակ, կառավարության ու Ազգային ժողովի գործունեությունը միտված է այդ հարցերի լուծմանը, թե բնակարանային, թե սոցիալական, թե նաև արժանապատիվ աշխատանքի հարցերի լուծմանը: Իրականում շատ խնդիրներ ունենք»,-ասաց նա: