ԱԺ ընդդիմադիր խմբակցությունների պատգամավորներից շատերին սպառնում է մանդատից զրկվելու վտանգը այս նստաշրջանի ավարտից, այսինքն՝ հուլիսի 17-ից հետո: ԱԺ նախագահ Ալեն Սիմոնյանն արդեն հայտարարել է, որ ինքն այդ հարցում խիստ է տրամադրված, մտադիր է ընդդիմադիր պատգամավորներին մանդատներից զրկելու հարցը դնել խորհրդի նիստի քննարկմանը և գործընթաց սկսել:
Այսպիսով՝ ներկայացնում ենք ցանկը սույն թվականի մայիսի 11-ի դրությամբ տեղի ունեցած 193 քվեարկությունների արդյունքներով:
Արմեն Չարչյան՝ 153 բացակա՝ 34 հարգելի («Հայաստան» խմբակցություն)
Գեղամ Մանուկյան՝ 129 բացակա՝ 1 հարգելի («Հայաստան» խմբակցություն)
Արթուր Վանեցյան՝ 115 բացակա՝ 0 հարգելի, («Պատիվ ունեմ» խմբակցություն)
Անդրանիկ Թևանյան՝ 105 բացակա՝ 1 հարգելի, («Հայաստան» խմբակցություն)
Ասպրամ Կրպեյան՝ 103 բացակա՝ 1 հարգելի, («Հայաստան» խմբակցություն)
Արմեն Ռուստամյան՝ 102 բացակա՝ 1 հարգելի, («Հայաստան» խմբակցություն)
Իշխան Սաղաթելյան՝ 101 բացակա՝ 1 հարգելի, («Հայաստան» խմբակցություն)
Լիլիթ Գալստյան՝ 99 բացակա՝ 1 հարգելի, («Հայաստան» խմբակցություն)
Արթուր Ղազինյան՝ 99 բացակա՝ 1 հարգելի («Հայաստան» խմբակցություն)
Վահե Հակոբյան՝ 98 բացակա՝ 1 հարգելի («Հայաստան» խմբակցություն)
ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը հայտարարել է, որ խորհրդարանական աշխատանքներն, ըստ էության, պարալիզացված են ընդդիմադիր գործընկերների համար: Հարցին, թե որքանով է հարգելի կամ անհարգելի ընդդիմադիր պատգամավորների բացակայությունը հանձնաժողովի նիստում, Վարդանյանը պատասխանել է․ որ ինքը չի որոշելու ԱԺ պատգամավորների բացակայության հարգելի կամ ոչ հարգելի լինելը: Ինքը այդ մասին տեղեկություն եմ ուղարկում ԱԺ նախագահին, և ԱԺ նախագահը, որպես ԱԺ բնականոն գործունեությունն ապահովող պաշտոնատար անձ, համապատասխան որոշումներ կկայացնի դրա վերաբերյալ: ԱԺ հանձնաժողովի նիստերին մասնակցելը ԱԺ պատգամավորների պարտականությունն է։ Նրա խոսքով՝ մեկ օրացուցային կիսամյակի ընթացքում քվեարկությունների կեսից ավելիին չմասնակցելու դեպքում պատգամավորը կարող է զրկվել մանդատից։
Այս առնչությամբ, սահմանադրական և միջազգային իրավունքի մասնագետ, «Հանուն Հանրապետության» կուսակցության անդամ Արտաշես Խալաթյանը, անդադառնալով ՍԴ հնարավոր դիմելուն, նշեց, որ դիմումը ՍԴ մուտք անելուց հետո ՍԴ-ն պետք է որոշում կայացնի դիմումը մուտքագրվելու օրվանից ոչ ուշ քան 30 օր հետո։
Յուրաքանչյուր նստաշրջանի ավարտից հետո բացակայությունների հարցը քննարկման առարկա է դառնում Ազգային ժողովի խորհրդում: Եթե ԱԺ խորհուրդը քվեարկում է համապատասխան դիմումով ՍԴ դիմելու համար, դիմումն ուղարկվում է ՍԴ՝ որոշելու համար կարգազանց պատգամավորներին մանդատից զրկելու հարցը: ՍԴ-ն սահմանված ժամկետում որոշում է ընդունում՝ բավարարել դիմումը կամ ոչ: Եթե ԱԺ խորհուրդն ի սկզբանե դեմ է քվեարկում ՍԴ դիմելու հարցի վերաբերյալ, պատգմավորների թվի 1/5-ը սեփական նախաձեռնությամբ ևս կարող է դիմել ՍԴ: Այսինքն այս հարցում վերջնական ատյանը ՍԴ-ն է, որն իրավասու է որոշում կայացնել յուրաքանչյուր պատգամավորի բացակայությունների վերաբերյալ: Ամեն մի պատգամավորի վերաբերյալ առանձին որոշում է ընդունվում»,-ասաց նա:
Հարցին, թե հնարավո՞ր է, որ այս ընթացքում պատգամավորները, ասենք, բժշկի թուղթ ներկայացնեն և բացակայությունները հարգելի համարվեն, Արտաշես Խալաթյանը պատասխանեց. «Օրենքը թույլ է տալիս յուրաքանչյուր նստաշրջանի ընթացքում մեկ անգամ որպես բոյկոտ չներկայանալ քառօրյային: Որքան գիտեմ և «Հայաստան», և «Պատիվ ունեմ» խմբակցությունները սպառել են այդ հնարավորությունը: Այստեղ հնարավոր է ժամանակավոր անաշխատունակության հիմքով, այսինքն բժշկի թղթով բացակայությունները հարգելի համարվի, կամ արտառոց ինչ-որ անձնական պատճառով, որը պետք է հիմնավորվի համապատասխան փաստաթղթերով: Եթե չի հիմնավորվում, բնականաբար, անհարգելի է համարվում բացակայությունը: Այս ամենը պետք է տեղի ունենա յուրաքանչյուր նստաշրջանի ավարտին, որովհետև Սահմանադրությունն ասում է, որ մեկ նստաշրջանի ընթացքում քվեարկությունների առնվազն կեսից ավելին բացակայելու պարագայում նոր կարող է պատգամավորի մանդատի դադարեցման հարց բարձրացվել: Իսկ նստաշրջանն ավարտվում է հունիսին»:
Արտաշես Խալաթյանը տեղեկացրեց, որ եթե այս գործընթացի արդյունքում պատգամավորը զրկվում է մանդատից, իր մանդատը բաժին է հասնում տվյալ քաղաքական ուժի ընտրական ցուցակի հաջորդ համարին, եթե վերջինս ինքնաբացարկի դիմում չի ներկայացրել:
