Պենտագոնն անհանգստացած է Չինաստանի ռազմական հզորության աճի կապակցությամբ: Այս մասին հայտնում է newsru.com կայքը: Ամերիկյան ռազմական փորձագետները զեկույց են պատրաստել, որտեղ նշել են, որ Չինաստանը 2020թ-ին կունենա բոլորովին նոր ու ժամանակակից բանակ:
РБК-ն տեղեկացնում է, որ ամերիկյան զինվորականներին մտահոգում է այն հանգամանքը, որ Չինաստանի կողմից իր բանակի վրա նման ուշադրությունը հավանաբար կապված է այն բանի հետ, որ Չինաստանը ԱՄՆ-ի հետ կարող է մոտ ապագայում ռազմական հակամարտություն ունենալ Թայվանի պատճառով: Ամերիկացիների ուշադրությունը հատկապես գրավել է այն հանգամանքը, որ Պակիստանում Օսամա Բեն Լադենին ոչնչացնելու ժամանակ կործանված ինքնաթիռի գաղտնի մասերը հետաքրքրել էին չինացիներին:
Ինչպես նշել էինք նախկինում, չինացի փորձագետները Պակիստանի իշխանություններից թույլտվություն էին ստացել հետազոտել ամերիկյան գաղտնի ինքնաթիռի կտորները, որոնց առանձնահատկությունը կայանում էր նրանում, որ ոչ բոլոր ռադարները կարող են հայտնաբերել նման կործանիչների: Հետագայում Չինաստանը պաշտոնապես հերքել էր նման լուրերը:
Բացի այդ, Չինաստանը վերջերս իր առաջին ռազմանավն ուղարկեց բաց ծով, ինչի կապակցությամբ ամերիկյան բարձրաստիճան պաշտոնյաները բացատրություններ էին պահանջում Չինաստանից:
Պենտագոնում վստահ են, որ Չինաստանի ռազմական առաջընթացն ուղղված է տարածաշրջանում անհրաժեշտության դեպքում ռազմական գործողություններ իրականացնելու հնարավորությունները մեծացնելու վրա:
Չինաստանը վերջին շրջանում մեծ առաջընթաց է ապրել բալլիստիկ հրթիռների` այդ թվում DF21D –երի արտադրման գործում: Այս մասին տեղեկացնում է The Washington Times-ը:
“Չինաստանը 2009թ-ին ուներ ընդամենը 350 հատ DH-10 տիպի հրթիռներ, իսկ 2010-ին արդեն 500” ասվում է զեկույցում:
Այս զեկույցի կապակցությամբ ԱՄՆ պաշտպանության նախարարի տեղակալ Մայքլ Շիֆֆերը հայտարարել է, որ Չինաստանի ռազմական ներուժի ավելացումը տարածաշրջանում կարող է լարվածություն առաջացնել:
