Ֆինլանդիան պաշտոնապես ազդարարեց ՆԱՏՕ-ին անդամակցելու որոշման մասին։ Ֆինլանդիայի նախագահ Սաուլի Նիինիստոյի և վարչապետ Սաննա Մարինի հայտարարությունը․ «Այս գարնան ընթացքում կարևոր քննարկում է տեղի ունեցել ՆԱՏՕ-ին Ֆինլանդիայի հնարավոր անդամակցության վերաբերյալ: Ժամանակ էր պետք, որպեսզի խորհրդարանը և ողջ հասարակությունը իրենց դիրքորոշումը հաստատեն այս հարցում: Ժամանակ էր անհրաժեշտ ՆԱՏՕ-ի և նրա անդամ երկրների, ինչպես նաև Շվեդիայի հետ սերտ միջազգային շփումների համար։ Մենք ցանկացել ենք քննարկմանը տրամադրել այն տարածքը, որն անհրաժեշտ է: Հիմա, երբ մոտ է որոշումների կայացման պահը, մենք մեր հավասար տեսակետներն ենք հայտնում նաև պատգամավորական խմբերին և կուսակցություններին տեղեկացնելու համար։ ՆԱՏՕ-ին անդամակցելը կուժեղացնի Ֆինլանդիայի անվտանգությունը։ Որպես ՆԱՏՕ-ի անդամ՝ Ֆինլանդիան կամրապնդի պաշտպանական դաշինքը։ Ֆինլանդիան պետք է անհապաղ դիմի ՆԱՏՕ-ին անդամակցելու համար։ Հուսով ենք, որ այս որոշումը կայացնելու համար դեռևս անհրաժեշտ համազգային քայլերն արագ կձեռնարկվեն առաջիկա մի քանի օրվա ընթացքում»։
Ֆիններից անմիջապես հետո շվեդները ևս մտադիր են նույն հայտարարությունն անել։ Reuters-ը, վկայակոչելով միանգամից հինգ անանուն դիվանագետի, հաստատում է արդեն կրկնվող ենթադրությունները, որ Ֆինլանդիան և Շվեդիան շատ արագ կընդունվեն ՆԱՏՕ։ Երկու երկրներն էլ երկար և սերտ համագործակցել են դաշինքի հետ և դրա կանոններին հարմարվելու երկար շրջանի կարիք չունեն։
Առաջիկա մի քանի օրերի ընթացքում Շվեդիան մտադիր է հանդես գալ նույն հայտարարությամբ, իսկ հաջորդ շաբաթ երկու երկրները ՆԱՏՕ-ին անդամակցելու պաշտոնական դիմումներ կներկայացնեն։ ՆԱՏՕ-ի պաշտոնյաների կարծիքով՝ Ֆինլանդիան և Շվեդիան դաշինք կարող են ընդունվել առաջիկա շաբաթներին, սակայն մինչև այն պահը, երբ նրանք լիովին և պաշտոնապես դառնան դաշինքի անդամ, ևս մեկ տարի կպահանջվի, որպեսզի դաշինքի բոլոր երկրների խորհրդարանները վավերացնեն այդ որոշումը: .
Շվեդիան երկու դար չեզոք երկիր էր, իսկ Ֆինլանդիան՝ գրեթե 80 տարի, մինչև Ուկրաինայի վրա Ռուսաստանի հարձակումը երկու երկրների քաղաքացիների մեծ մասը դեմ էր ռազմական բլոկներին միանալուն։ Սակայն փետրվարի 24-ից հետո պատկերը կտրուկ փոխվեց։ Այժմ, ըստ վերջին հարցման, ֆինների 76%-ը կողմ է ՆԱՏՕ-ին անդամակցելուն, դեմ՝ 12%-ը։
