Ինչպես հաղորդում է BBC-ն, հակամարտության վերջին ակտիվ փուլի ընթացքում առաջին անգամ ապստամբները համաձայնել են չխոչընդոտել Լիբիայի առաջնորդ Մուամար Քադաֆիին, եթե նա համաձայնի անհապաղ լքել երկիրը, չնայած այն փաստին, որ ապստամբները երեկ ավելի քան մեկ միլիոնի պարգևատրում են խոստացել այն մարդուն, ով կենդանի կամ սպանված կներկայացնի «Քադաֆիի գլուխը»:
Բենղազիում Ազգային անցումային խորհուրդը երեկ նաև հայտարարել է, որ հետաձգում է Բենղազիից ժամանակավոր կառավարության տեղափոխումը Տրիպոլի, քանի որ այնտեղ դեռ չի հաջողվել ապահովել անվտանգությունը: Մինչդեռ երեկ արաբական լրատվամիջոցներում հաղորդում է տարածվել, որ սպանվել է Քադաֆիի որդիներից մեկը` Մուհամադը: Այս մասին գրել է Al-Arabia հեռուստաալիքը՝ Twitter միկրոբլոգերի կայքի իր էջում: Երկուշաբթի օրը Մուհամադին ձերբակալել էին նրա բնակարանում, սակայն հետագայում հայտնի էր դարձել, որ Քադաֆիին հավատարիմ ուժերն ազատել են նրան:
Երեկ լուրջ հարված է ստացել Լիբիայի առաջնորդի թիմը, քանի որ այն լքել է հետախուզությունում ազդեցությամբ երկրորդ դեմքը` Խալիֆա Մուհամադ Ալին, որն անցել է ապստամբների կողմը: Նա հայտարարել է, որ պատրաստ է ծառայել ժողովրդին և կոչ է արել բարձրաստիճան պաշտոնյաներին հետևել իր օրինակին:
