Գյումրու Ռուսական տան նախաձեռնությամբ մայիսի 9-ին, համայնքային ցուցասրահում բացվեց Տաթև Մնացականյանի «Մեծ Հաղթանակի դեմքեր» խորագրով ֆոտոցուցահանդեսը: Նախագիծը նվիրված է Հայրենական մեծ պատերազմի հայ վետերաններին, նրանց, ովքեր ճակատում էին կամ թիկունքում ծառայում էին ընդհանուր գործին:
«Մեծ հաղթանակի դեմքերը» ֆոտոցուցահանդեսը, կյանքի է կոչվել Ռուսական տան կողմից՝ Հայաստանում Ռուսաստանի դեսպանատան աջակցությամբ, «Թովմասյան» հիմնադրամի հետ համատեղ:
Լուսանկարիչ Տաթև Մնացականյանը շրջել է Հայաստանի ավելի քան 50 քաղաքներում և գյուղերում՝ այցելելով ամենահեռավոր շրջաններ, և նկարել է 110 վետերանների պատմության մեջ նրանցից յուրաքանչյուրի կերպարը պահպանելու համար:
«Նախագիծը նախատեսել էի կյանքի կոչել հաղթանակի 75-ամյակին, սակայն համավարակի պատճառով աշխատանքները հետաձգվեցին: Նրանց առողջությունը բոլորիս համար շատ թանկ է, բայց նաև հապաղել էլ չէր կարելի: Օրեցօր նրանց թիվը պակասում էր: Դրա համար մեկ տարվա ընթացքում ահռելի աշխատանք արվեց. ավելի քան հիսուն քաղաքներում ու գյուղերում եղանք: Եղել ենք նաև սահմանամերձ համայնքներում:
Որոշ հերոսներ արդեն չկան, բայց միևնույն ժամանակ նրանք մեզ հետ են` լուսանկարչական դիմանկարների շնորհիվ: Վետերանների հետ անցկացրած յուրաքանչյուր պահը դարձավ իմ կյանքի մի մասը: Ցանկանում էի լուսանկարներում փոխանցել հաղթանակի ոգին», – «Արմենպրես»-ի հետ զրույցում նշեց Տաթև Մնացականյանը՝ տեղեկացնելով, որ ցուցահանդեսը ներկայացվել էր նաև Երևանում, Կապանում և Աբովյանում:
Ցուցահանդեսը գյումրեցիների ու Գյումրի այցելած հյուրերի համար բաց կլինի մեկ շաբաթ:
