ՀՀ վարչապետ Նիկոլ Փաշինյանը կառավարության նիստին անդրադարձել է կառավարության՝ Զանգեզուրի պղնձամոլիբդենային կոմբինատի սեփականատեր դառնալու հետ կապված խոսակցություններին։
Նա նշել է, որ ոմանք դա կասկածելի, կոռուպցիոն գործարք են համարում. «Սա շատ զարմանալի է: Եթե որևէ իշխանավոր, կամ իշխանավորի հորեղբոր տղա օֆշորներով այդ սեփականության տերը դառնար, ոչ մեկը չէր անհանգստանա, ինչպես եղել է միշտ, բայց որ պետությունը գույք է ձեռք բերել, չգիտես ինչու՝ կասկածելի է թվում։ Ի՞նչն է կասկածելի. ներդրողը, ով ձեռք է բերել հին բաժնետերերից բաժնեմաս, որոշել է Հայաստանի Հանրապետությանը նվիրատվություն անել, և Հայաստանի Հանրապետությունն էլ շնորհակալությամբ այդ նվիրատվությունն ընդունել է»,- ասել է Փաշինյանը։
Այս առնչությամբ, իրավական, բնապահպան Նազելի Վարդանյանը «Առաջին լրատվական»-ի հետ զրույցում նշեց. «Բա ինձ ինչի՞ չեն նվիրատվություն անում, կամ ինչու է գրված, որ կառավարության աշխատակազմը պետք է կառավարի, դա կառավարության աշխատակազմի գործառո՞ւյթն է: Հիմա էլ ինչ-որ նոր մարմին են ստեղծել, որը կառավարում է: Այդ գործարքը շարունակում է մութ մնալ: Ես բարձրագույն շահառուների խորհրդի անդամ եմ՝ հանրային սեկտորից ընտրված: Ու բոլոր իրական շահառուները, պայմանագրերը պետք է թափանցիկ լինեն: Դա հանքարդյունաբերության մեջ թափանցիկության միջազգային գործընթաց է, որին մենք կողմ ենք դարձել:
Հիմա կոմբինատի ամենակարևոր պայմանագիրը, որով ընկերության բավականին մեծ մասը՝ 15 տոկոսը, ուր է գնացել, ինչ գործարք է եղել, ինչ պարտավորություն է իր վրա վերցրել պետությունը, անհայտ է: Կարող է այդ նվիրատվությունն արել է, փոխարենը ինչքան պարտք ու պահանջ, գողացած բան կա, մեր բյուջեի վրա ընկնի: Մեզ պե՞տք է նման նվեր: Նիկոլ Փաշինյանն ինքն էլ էր ասում, որ մենք ենք տերը էս երկրի: Դե եթե ես եմ տերը, ես պետք է իմանամ՝ այդ ժառանգությունը կամ այդ նվիրատվությունը, որ մեզ տվել են, ի՞նչ պարտավորություներ են հետը եկել: Մարդը եթե ժառանգություն է ընդունում ու տեսնում է, որ այդ մարդը մեծ պարտքեր ունի, այդ ժառանգությունը չի ընդունում: Կարող է մեր ժողովուրդն այդ նվերը չուզենար: Դրանից հետո 15 մլրդ նախկին տնօրենը բերում մուծում է բյուջե: Սա ի՞նչ է նշանակում, այսինքն գողություն է եղել այդ բյուջեից: Այսինքն արդեն կրիմինալ կա. իսկ գուցե ոչ թե 15 այլ 115 մլրդ պետք է բերեր մուծեր: Ինչո՞ւ չեն ասում՝ ինչի համար է բերել, մուծել: Ինձ մոտ լիքը հարցեր կան և դրանք բացահայտված չեն: Եթե վարչապետին թվում է, որ կառավարության նիստին ասեց ու անցավ, այդպես չի»:
Նազելի Վարդանյանի խոսքով, եթե նման դեպքերում այն էլ ժողովրդի կողմից ընտրված իշխանությունը ինչ-որ բաներ թաքցնում է, արդեն կասկածի տեղիք է տալիս. «Գուցե ոչ մի բան էլ չկա, բայց անկախ քեզնից կասկած է առաջանում, թե ինչ կա, որ էդպես թաքցնում են: Հիմա, որ նայում ես, կարծես լավ բան է եղել, կարող են ասել՝ վա՞տ է, որ պետությանը նվիրել են, պետությունը մաս ունի: Այո, բայց եթե իրենք այնտեղ այնքան են թալանել, գողացել, չգիտեմ ինչ միջազգային պարտավորություններ ունեն ու այդ ամբողջը վաղը մեզ վրա է ընկնելու, դա շատ վատ է: Մենք պետք է իմանանք՝ ինչ նվեր ենք ստանում: Ասում են՝ ձրի պանիրը միայն թակարդում է լինում»:
Ինչ վերաբերում է Նիկոլ Փաշինյանի հայտարարությանը, թե ներդրողը, որ ձեռք է բերել հին բաժնետերերից բաժնեմաս, որոշել է Հայաստանին նվիրատվություն անել, բնապահպան ասաց. «Իսկ ինչո՞ւ է որոշել նվիրատվություն անել, իսկ որ այդ նույն բաժնետերը Ամուլսար է առնում, նույն բաժնետերն արդեն երկու հանք առել է, դա կոռուպցիա չի՞: Այսինքն նվեր է տալիս, որ արտոնյալ պայմաններ ունենա՞: Այդ նվերից հետո ինքն արդեն մի քանի հանքի տեր է դարձել:
Այսինքն եթե նվերից հետո պարզ է դառնում, որ այդտեղ կրիմինալ կա, որի արդյունքում բերում 15 մլրդ գումար են մուծում ու ոչ ոք չի պատժվում: Մենք ունենք տեսչական մարմնի ակտը, որն այդպես էլ չհրապարակվեց, չթողեցին ստորագրի տեսչական մարմնի պետը, միանգամից գործից ազատեցին: 44 օր ստուգելուց հետո չթողեցին՝ էդ մարդը ստորագրի ակտը: ՍՈւ դա այն ժամանակ, երբ վարչապետը Դավոսում էր և իրավունք չուներ հրաման ստորագրելու:
Այս ամենը հարցեր է առաջացնում: Թե՞ իրենց թվում է, որ ինչ-որ բան ասացին ու անցավ, գնա՞ց: Չի անցնելու: Բոլոր մարդիկ էլ հաց են ուտում, խոտ չեն ուտում ու բոլորն էլ հասկանում են, որ այստեղ մի բան էն չի: Եթե դուք գտնում եք, որ ամեն ինչ նորմալ է, ներկայացրեք, մենք էլ տեսնենք, ծափ տնք, ասենք՝ կեցցե մեր կառավարությունը, շատ լավ բան է արել»:
