Հազարավոր կանայք և տղամարդիկ երեքշաբթի օրը՝ մայիսի 3-ին, Նյու Յորքում և ամերիկյան այլ քաղաքներում դուրս են եկել ցույցերի՝ ընդդեմ ԱՄՆ Գերագույն դատարանի՝ աբորտի իրավունքը չեղարկելու հնարավոր որոշման: «Հիմա լռելու ժամանակը չէ»,- ասել է Նյու Յորքի գլխավոր դատախազ Լետիտիա Ջեյմսը՝ Մանհեթենում հավաքի ժամանակ, հղիության արհեստական ընդհատման իրավունքների պաշտպանությունը որակելով որպես «ամենամեծ մարտերից մեկը»:
Նրա խոսքով՝ սեփական մարմինը տնօրինելու իրավունքը «հիմնարար իրավունք է»։ Երիտասարդ ցուցարարներից շատերը ձեռքին ցուցապաստառներ էին պահել՝ «Իմ մարմինը իմ ընտրությունն է», «Դադարեցրե՛ք պատերազմը կանանց դեմ» և «Ես ավելի քիչ իրավունքներ կունենամ, քան մայրս» կարգախոսներով։
Նախօրեին ամերիկյան Politico թերթը հրապարակել էր որոշման նախագծի պատճեն, ըստ որի՝ ԱՄՆ Գերագույն դատարանը մտադիր է վերացնել հղիությունը դադարեցնելու սահմանադրական իրավունքը՝ ամրագրված 1973 թվականի նախադեպային որոշմամբ։ Եթե Գերագույն դատարանը, որն ունի պահպանողականների ճամբարի դատավորների մեծամասնությունը, չեղարկի այս պատմական որոշումը, կարող են սահմանվել պետական արգելքներ կամ աբորտների զգալի սահմանափակումներ: ԱՄՆ 50 նահանգների մոտ կեսը նախատեսում է դա անել։ Գերագույն դատարանի որոշումը սպասվում է հունիսին։