Կառավարությունը հայտնում է, որ վարչապետ Նիկոլ Փաշինյանն Էյդ ալ Ֆիտր տոնի կապակցությամբ շնորհավորական ուղերձներ է հղել արաբական մի շարք երկրների ղեկավարների: Շնորհավորական ուղերձներ են հղվել Եգիպտոսի, ԱՄԷ-ի, Կատարի պետության, Թունիսի, Սիրիայի, Հորդանանի Հաշիմինյան թագավորության, Իրաքի, Քուվեյթի առաջնորդներին: Էյդ ալ Ֆիտր տոնը կապված է մահմեդականների սրբազան ամսվա՝ Ռամադանի ավարտի հետ:
Հայաստանի վարչապետը, սակայն,չի շնորհավորել Սաուդյան Արաբիայի առաջնորդներին: Այդ երկրի հետ Հայաստանը չունի դիվանագիտական հարաբերություններ։
Արաբագետ Հայկ Քոչարյանն «Առաջին լրատվական»-ի հետ զրույցում նշեց, որ Էյդ ալ Ֆիտրը մեծ և կարևոր տոն է իսլամում և առհասարակ մուսուլմանների հանար և ըդնունված է այդ տոնի կապակցությամբ շնորհավորել գործընկեր ու բարեկամ երկրների առաջնորդներին, մուսուլմաններին։ Ըստ մեր զրուցակցի՝ հավանաբար Հայաստանի շնորհավորանքն էլ այդ կոնտեքստում է։
Քոչարյանը նշեց, որ ծանոթ չէ այն երկրների ցանկին, որոնց ՀՀ առաջնորդը շնորհավորել է, սակայն, եթե իսկապես Սաուդյան Արաբիային շնորհավորանք չի հղվել՝ ցանկալի կլիներ դա անել, անկախ այն հանգամանքից, որ այդ երկրների հետ Հայաստանը չունի դիվանագիտական հարաբերություններ․ «Հավանաբար շնորհավորանք է հղվել այն երկրներին, որոնց հետ կան դիվանագիտական հարաբարերություններ։ Ցանկալի կլիներ շնորհավորել նաև Սաուդյան Արաբիային։ Դա իսլամական տոն է ու նման քայլը Սաուդյան Արաբիան կգնահատեր»,-ընդգծեց նա։
Խոսելով այն մասին, թե հնարավո՞ր է արդյոք քայլեր ձեռնարկել Սաուդյան Արաբիայի հետ դիվանագիտական հարաբերությունների հաստատման ուղղությամբ, մեր զրուցակիցն ասաց․ «Դիվանագիտական հարաբերությունները երկխոսության ձև են, եթե սկսում եք խոսել՝ ինչ-որ փուլում դրանք ձևակերպվում են որպես դիվանագիտական հարաբերություններ։ Իհարկե ցանկացած երկխոսության արդյունքում հնարավոր է հասնել դրան՝ եթե կա այդպիսի նպատակ։ Դա ժամանակատար գործ է և պարզապես պետք է անել։ Ոչինչ բացառել պետք չէ»։
Մեր զրուցակիցը հիշեցրեց, որ մի քանի ամիս առաջ ՀՀ ԱԳ նախարար Արարատ Միրզոյանը Մյունխենում հանդիպում էր ունեցել Սաուդյան Արաբիայի ԱԳ նախարար Ֆայսալ բին Ֆարհան Ալ Սաուդի հետ․ «Տարբեր հարթակներ պետք է օգտագործվեն այդ ուղղությունը զարգացնելու համար։ Բայց քանի որ բացահայտ չի նշվում առաջնահերթությունների մասին, դժվար է կանխատեսել,թե հաջորդիվ ինչ կանեն»։
Արաբագետը համարում է, որ ցանկացած երկրի հետ պետք է խոսել, բոլոր ուղղությունները մեզ համար կարևոր են։ Եվ եթե, ըստ մեր զրուցակցի՝ դու չե խոսում, միշտ հայտնվում են երրորդ երկրներ, որոնք քո փոխարեն խոսում են»,-եզրափակեց նա։
