Կապանցիներն այնքան դժգոհ են իրենց քաղաքում «Հայջրմուղկոյուղու» աշխատանքից, որ դիմել են դատարան՝ պահանջելով բնապահպանության նախարարությունից, որպեսզի վերջինս վարչական պատասխանատվության ենթարկի ընկերությանը։ Խնդիրն այն է, որ կոյուղաջրերը, որ լցվում են Ողջի գետը, չեն ենթարկվում մեխանիկական ու կենսաբանական մաքրման։
«Դժգոհ ենք ընդհանրապես «Հայջրմուղկոյուղու» ծառայությունների որակից։ Ակնհայտ սուտ են այն հայտարարությունները, թե ընկերությունը սպառողին է հասցնում մաքուր, ընդունված ստանդարտին համապատասխան որակի ջուր։ Տեղական հեռուստատեսությամբ ընկերության աշխատակիցները հայտարարում են նաև, որ քաղաքում 20-ժամյա ջրամատակարարում է կատարվում, սակայն սա ևս սուտ է։ Ջուր տալիս են ամենաշատը 10 ժամ օրական»,- մեզ հետ զրույցում ասում է Կապանի տարածաշրջանի զարգացման հիմնադրամի տնօրեն Արմեն Փարսադանյանը։
Փարսադանյանը տեղեկացնում է, որ օգոստոսի 26-ին քաղաքապետարանում անցկացվելու է կլոր սեղան- քննարկում, որտեղ քննության են ենթարկելու «Հայջրմուղկոյուղու» աշխատանքը։ Նա ասում է, որ Կապանի քաղաքացիական հասարակությունը ներկայացնող կազմակերպությունները արձանագրությունում նշելու են, որ դեմ են Հայջրմուղի հետ պայմանագրի երկարացմանը և չեն ուզում, որ այն շարունակի իր ծառայությունները Կապանում։
Մինչ դատարանին դիմելը կապանցիները դիմել են ընկերությանը՝ խնդրելով մաքրման կայաններ կառուցել և չաղտոտել գետը։ Սակայն «Հայջրմուղկոյուղու» ֆրանսիացի սեփականատերերը մերժել են ՝ պատճառաբանելով, որ բավարար միջոցներ չունեն։
