ՀՀ գլխավոր դատախազ Աղվան Հովսեփյանն այսօր ԵԱՀԿ երևանյան գրասենյակի հետ հուշագրի ստորագրումից հետո, պատասխանելով լրագրողների հարցերին, անդրադարձավ վերջին շրջանում մասսայական դարձած ավազակային հարձակումներին: Հովսեփյանը նշեց, որ օրերս ինքը կոլեգիայի նիստ է հրավիրել, որտեղ արտահայտվել է իրենց մտահոգությունն ավազակության գործերի առումով:
«Այս կիսամյակի ընթացքում մենք հանրապետությունում ունենք ավազակության դեպքերի աճ, եթե անցած տարվա առաջին կիսամյակում գրանցվել է 59 ավազակային հարձակում, այս տարվա առաջին կիսամյակում արդեն գրանցվել է 72 ավազակության դեպքեր»,- մանրամասնեց Հովսեփյանը, հավելելով, որ հանցավորության մակարդակը և՛ Հայաստանում կայուն է, և՛ ԱՊՀ երկրների հետ համեմատ՝ հանցավորության մակարդակով վերջին տեղերում ենք գտնվում:
Այդուամենայնիվ, Հովսեփյանը նկատեց, որ ավազակային հարձակումները, լինելով առանձնապես ծանր հանցագործություն, մտահոգիչ են թե՛ դատախազության, թե՛ ոստիակնության համար: Աղվան Հովսեփյանը տեղեկացրեց, որ ուսումնասիրելով եղած գործերը, ցուցում է տվել մի քանի գործեր միավորել մեկ ընդհանուր վարույթում. «Ակնհայտ է, որ այս հանցագործությունները մեկ ձեռագրով են կատարվում: Ակնհայտ է, որ դա մի խումբ է, որը զինված է և կայուն հանցավոր խումբ է: Այդ պատճառով ցուցում է տրվել նաև, որ այդ արարքները որակվեն ոչ թե ավազակություն, այլ բանդիտիզմ»:
Նշենք, որ վերջին շրջանում բավականին շատացել են ավազակային հարձակումները, այդ թվում` հայտնի մարդկանց տների վրա կատարվածները: Դրանցից ամենաաղմկոտները Հայաստանի խորհրդարանի նախկին պատգամավոր Նապոլեոն Ազիզյանի, «Լինսի» հիմնադրամի «Ճանապարհային շինարարություն» ծրագրի գրասենյակի նախկին տնօրեն Էդվարդ Բեզոյանի և Երևանի Մալաթիա-Սեբաստիա վարչական շրջանի նախկին ղեկավար, Կադաստրի պետական կոմիտեի պաշտոնյա Աղվան Գրիգորյանի տների վրա հարձակումներն են։
