Կենտրոնական բանկի խորհրդի անդամ Արտակ Մանուկյանը գրում է.
«1000 հարկատուների ցանկում ներառված կազմակերպությունների կողմից պետական բյուջե վճարված հարկերի ընդհանուր մեծությունը 2022թ. առաջին եռամսյակի արդյունքներով որոշակի ծավալային և կառուցվածքային փոփոխություններ է արձանագրել` նախորդ տարվա նույն ժամանակահատվածի համեմատությամբ։ Կից որոշ դիտարկումներ.
-վճարված հարկերի ընդհանուր մեծությունը կազմել է ավելի քան 327 մլրդ դրամ, ինչը 26%-ով կամ 67 մլրդ դրամով ավելի է նախորդ տարվա համապատասխան ցուցանիշից, իսկ 2020թ․ մակարդակը գերազանցում է 52 մլրդ դրամով,
-100 խոշորագույն հարկատուների կողմից վճարվել է շուրջ 200 մլրդ դրամի հարկ, որը 48 մլրդ դրամով ավելի է նախորդ տարվա համապատասխան ցուցանիշից,
-1000 հարկատուների ցանկում ներառված ընկերությունների վճարած հարկերի անհամաչափության աստիճանի աճ է գրանցվել: Ցանկի ամենախոշոր և ամենափոքր 10 ընկերությունների վճարած հարկերի ընդհանուր մեծության հարաբերակցությունը կազմել է 182 անգամ, նախորդ տարվա 154 անգամի համեմատությամբ: Ամենախոշոր և ամենափոքր 100 ընկերությունների պարագայում նույն հարաբերակցությունը կազմել է 36, ինչը ևս բարձր է նախորդ տարիների մակարդակից,
-առկա է տարածքային խիստ անհավասարաչափ բաշխվածություն: 1000 խոշոր հարկատուների ցանկի սուբյեկտների 82%-ը գրանցված է Երևանում: Նրանց բաժին է ընկնում հարկային մուտքերի 75%-ը, շահութահարկի 54%-ը, եկամտային հարկի 89%-ը, ԱԱՀ 83%-ը, ակցիզային հարկի 77%-ը,
-պղնձի գների աճով պայմանավորված 1000 հարկատուների ցանկի առաջին հորիզոնականում Զանգեզուրի ՊՄԿ-ն է՝ 35․4 մլրդ դրամ վճարած հարկերի ընդհանուր մեծությամբ։ ԶՊՄԿ-ին բաժին է ընկնում 1000 հարկատուների ցանկում ներառված բոլոր հարկատուների վճարած հարկերի ընդհանուր մեծության 10․8%-ը։ Նախորդ տարվա առաջին եռամսյակում այս ընկերության մասնաբաժինը ընդամենը 3․8% էր, իսկ 2020-ին՝ 1․9%,
-առաջին 10 հարկատուների մասնաբաժինը մոտ 30% է, ինչը ևս բարձր է նախորդ տարիների համեմատությամբ։ Իսկ խոշորագույն 100-ին բաժին է ընկնում ցանկի բոլոր հարկատուների կատարած հարկային վճարումների ընդհանուր մեծության 61%-ը, մինչդեռ օրինակ վերջին 100-յակի մասնաբաժինն ընդհանուրում միայն 1․7% է,
-ուղղակի հարկերի տեսակարար կշիռը 1000 հարկատուների ցանկում ներառված սուբյեկտների կողմից ՀՀ պետական բյուջե վճարված հարկերի կառուցվածքում նվազել է և կազմել է 33․1% (2021-ին`36․0%, 2020թ-ին`38%)»:
