Ֆրանսիայի ծայրահեղ աջակողմյան առաջնորդին մեղադրանք է առաջադրվել ԵՄ ֆինանսական միջոցների յուրացման մեջ
Ֆրանսիայի դատախազը կիրակի օրը հայտարարել է, որ ուսումնասիրում է Եվրամիության խարդախության դեմ պայքարի գործակալության (OLAF) զեկույցը, որը մեղադրում է նախագահի ծայրահեղ աջակողմյան թեկնածու Մարին Լը Պենին և նրա կուսակցության անդամներին ԵՄ ֆինանսական միջոցները յուրացնելու մեջ:
Հիշեցնենք, որ Լը Պենը Էմանուել Մակրոնի մրցակիցն է Ֆրանսիայում կայանալիք նախագահական ընտրություններում։ Սոցիոլոգիական հարցումները ցույց են տալիս, որ Մակրոնն առաջ է Լը Պենց հաջորդ կիրակի կայանալիք ընտրությունների երկրորդ փուլից առաջ:
Փարիզի դատախազությունը հաստատել է, որ ուսումնասիրում է մարտի 11-ին Եվրոպական խարդախությունների դեմ պայքարի գրասենյակից ստացված զեկույցը։
Mediapart հետաքննական կայքը շաբաթ օրը հայտնել է, որ OLAF-ի զեկույցի համաձայն՝ Լը Պենը յուրացրել է 140 հազար եվրո, իսկ նրա կուսակցության անդամները՝ ընդհանուր առմամբ 617 հազար եվրո։ Նրանք մեղադրվում են ոչ թե անձնական շահ ստանալու մեջ, այլ ԵՄ-ից կադրերի և կուսակցական միջոցառումների համար ծախսեր պահանջելու մեջ։
Լը Պենի գրասենյակը չի մեկնաբանել այս լուրը։ Սակայն Ազգային միություն կուսակցության նախագահի պաշտոնակատար Ջորդան Բարդելը Europe 1 ռադիոկայանին տված հարցազրույցում ասել է, որ ֆրանսիացիները չեն խաբվի Եվրամիության և եվրոպական կառույցների փորձերին՝ միջամտելու նախագահական արշավին և վնասելու Մարին Լը Պենին։
Նա ասաց, որ իր կուսակցությունը երկու բողոք է ներկայացրել OLAF-ի դեմ և երրորդը կներկայացնի՝ ի պատասխան վերոհիշյալ զեկույցի:
Լը Պենի փաստաբան Ռոդոլֆ Բոսելուտը BFM TV-ին ասել է, որ իր պաշտպանյալը հերքում է մեղադրանքները։ Փաստաբանի խոսքով՝ ինքը դեռ չի հարցաքննվել, և ոչ ինքը, ոչ էլ Լը Պենը չեն տեսել OLAF-ի զեկույցը։
Լը Պենը հետաքննվում է 2017 թվականից՝ խորհրդարանական օգնականներին վճարելու նպատակով ԵՄ միջոցներ ստանալու և ենթադրյալ չարաշահումներ իրականացնելու հետաքննության շրջանակներում:
Հոդվածը պատրաստվել է Reuters-ի նյութի հիման վրա
