Օգոստոսի 23-ին Վենեսուելայի նախագահ Ուգո Չավեսը որոշում է կայացրել ազգայնացնելու ոսկու արդյունահանումը. հաղորդում է The Washington Post-ը՝ տեղեկացնելով, որ այս մասին Չավեսն ասել է` հանդես գալով հեռուստաուղերձով: Նա նաև տեղեկացրել է, որ ԱՄՆ-ի և Եվրոպայի բանկերում պահվող վենեսուելյան ոսկու պաշարները առաջիկայում կվերադարձվեն հայրենիք:
Այս քայլը նա մասնավորապես բացատրել է անօրինական հանքարդյունաբերության դեմ պայքարելու անհրաժեշտությամբ, որը նախնական տեղեկություններով՝ կազմում է հանքերի մոտ 60%-ը: Բացի այդ, ըստ նախագահի, այս քայլը թույլ կտա ամրապնդելու Վենեսուելայի ազգային և տնտեսական անկախությունը: Ելույթի ժամանակ նա ձեռքում է պահել Կենտրոնական բանկից բերված ոսկու ձուլակտոր: Չավեսը նաև հավելել է, որ արևմտյան բանկերից դուրս հանվող մոտ 6 մլրդ դոլարի ակտիվները կտեղափոխվեն Վենեսուելայի բարեկամ երկրներ, մասնավորապես` Չինաստան, Ռուսաստան և Բրազիլիա:
