Իշխանությունները պատշաճ ընտրություններ անցկացնելու քաղաքական կամք չեն դրսևորում: Այսօր «Առաջին լրատվականի» հետ զրույցում նման տեսակետ հայտնեց ՀԱԿ Գյումրիի տարածքային գրասենյակի ղեկավար Աշոտ Զաքարյանը` մեկնաբանելով Շիրակի մարզում արդեն ձևավորված 4 ընտրատարածքային ընտրական հանձնաժողովներում վերջերս կատարված փոփոխությունները:
«Ի սկզբանե ընտրական հանձնաժողովների նկատմամբ որևէ վստահություն չի եղել և չի լինի՝ այն պարզ պատճառով, որ ԿԸՀ-ն ձևավորվել է շատ կասկածելի հանգամանքներում, ավելին՝ ԿԸՀ-ում նախագահ է նշանակվել մի մարդ, ով անմիջական պատասխանատվություն է կրում 2008 թվականի կեղծված նախագահական ընտրությունների համար»,- նշեց Ա. Զաքարյանը` ընդգծելով, որ այս բոլոր հանձնաժողովները որևէ վստահություն չեն կարող ներշնչել:
Շարունակելով` Ա. Զաքարյանը նշեց, որ այս ամենին ավելացավ նաև այն հանգամանքը, որ հանձնաժողովի նախագահներ են նշանակվել մարդիկ, ովքեր կոնկրետ կուսակցությունների վերահսկողության տակ են գտնվում, մասնավորապես՝ մի տեղամասում «Բարգավաճ Հայաստան» կուսակցության ներկայացուցիչը, իսկ մյուս հանձնաժողովներում՝ Հայաստանի Հանրապետական և «Օրինաց երկիր» կուսակցությունների ներկայացուցիչները: Նրա համոզմամբ` սրանք հատուկ կազմակերպված փոփոխություններ են, որոնք նպատակ ունեն շարունակելու կեղծիքների շարանը:
Խոսելով հանձնաժողովների նախագահների վստահելիության մասին` ՀԱԿ ներկայացուցիչն ընդգծեց, որ նորընտիր նախագահները արդյունքներ կեղծելու մեջ բավականին մեծ հմտություն ունեն և այս գործընթացում նոր չեն:
«Սա խոսում է այն մասին, որ իշխանություններն այնուամենայնիվ նորմալ ընտրություններ անցկացնելու քաղաքական կամք չեն դրսևորում»,- նշեց Ա. Զաքարյանը` համոզված, որ իշխանությունն արել է ամեն բան, որպեսզի ևս մեկ անգամ կեղծված ընտրությունների միջոցով հասնի իշխանության:
