Վարչապետ Նիկոլ Փաշինյանը երկօրյա աշխատանքային այցով Բրյուսելում է։ Փաշինյանն այսօր առանձնազրույց կունենա Եվրոպական խորհրդի նախագահ Շառլ Միշելի հետ։Բրյուսելում նախատեսվում է Փաշինյանի, Միշելի և Ալիևի եռակողմ հանդիպումը։ Հայաստանի ու Ադրբեջանի առաջնորդները վերջին անգամ բանակցել էին մոտ մեկ ամիս առաջ՝ Եվրոպական խորհրդի ղեկավար Շառլ Միշելի և Ֆրանսիայի նախագահի նախաձեռնությամբ ու մասնակցությամբ։ Իսկ ահա այսօրվա քննարկման առանցքը այսպես կոչված «Խաղաղության պայմանագրի» շուրջ հարցերն են լինելու։ Իշխանության ներկայացուցիչ Էդուարդ Աղաջանյանը երեկ անկեղծացել էր՝ քննարկվելու են ցավոտ ու սուր հարցեր։ Թեմայի շուրջ «Առաջին լրատվական»-ը զրուցել է քաղաքագետ Արեգ Քոչինյանի հետ:
Քոչինյանը կարծում է, որ արցախյան հարցի կարգավորման համար լավագույն տարբերակը կլինի, որ միջնորդի դերը ստանձնի Արևմուտքը, ոչ թե Ռուսաստանը․ «Արցախում ռուսական կոնտինգենտը չի տեղակայվել արցախահայության անվտանգությունը ապահովելու համար: Արցախը ռուս-ադրբեջանական հարաբերությունների համար դարձել է գործիք․ մեզ ձեռնտու է Արևմուտքի միջնորդությունը»: