Քաղաքագետ Սերգեյ Մինասյանն այսօր լրագրողների հետ հանդիպման ժամանակ խոսեց Հայաստանի Անկախության հռչակագրի ընդունման և դրա նշանակության մասին։ Հիշեցնենք, որ 20 տարի առաջ այս օրը՝ օգոստոսի 23-ին Գերագույն խորհուրդն ընդունեց Հայաստանի Անկախության հռչակագիրը, որով Հայաստանի Խորհրդային Սոցիալիստական Հանրապետությունը դարձավ Հայաստանի Հանրապետություն։
«Պետության անխակության 20-ամյակի շեմին շատ կարևոր է նշելը, որ մեր երկրում ընդունված փաստաթուղթը հենց Անկախության հռչակագիր էր, այլ ոչ թե, ասենք, ավելի մեղմ սուվերենիտետի կարգավիճակ հռչակող փաստաթուղթ, ինչը եղավ մի քանի այն հետխորհրդային պետություններում»,- ասում է քաղաքագետը։ Հռչակագրի կետերը հիշելով՝ Սերգեյ Մինասյանը նշում է, որ անկախության 20 տարիներին կյանքի չեն կոչվել սոցիալ-տնտեսական վիճակի հետ կապված դրույթները, իսկ ձեռբերումները հենց անկախ լինելն է, արցախյան հարցի փաստացի լուծումը և բանակի ստեղծումը։
Ըստ քաղաքագետի՝ քաղաքական մշակույթի զարգացվածության տեսակետից մենք առաջընթացի փոխարեն հետընթաց ենք ապրել, 1990-ականների քաղաքական էլիտան այլ էր, և ներքաղաքական դիսկուրսը ավելի մեղմ էր, քան հիմա։
