ՀՀ փոխվարչապետ, տարածքային կառավարման նախարար Արմեն Գևորգյանն այսօր այցելել է չինական “Հուավեյ” (Huawei Technologies Co. Ltd) կորպորացիայի` Շենժեն քաղաքում գտնվող կենտրոնական գրասենյակ, հանդիպել առաջին փոխնախագահ Գո Տիանմինի (Guo Tianmin) հետ:
Ընկերությունը աշխարհում հեռահաղորդակցության ոլորտի առաջատարներից է, մասնագիտացած է ոլորտի մի շարք ճյուղերում` սարքավորումների արտադրություն, էլեկտրոնային կառավարում, հեռահաղորդակցական համակարգեր և այլն: Այն լայն գործունեություն է ծավալում ԱՊՀ մի շարք երկրներում և արդեն մեկ տարի է, ինչ ներկայացուցչություն ունի նաև Հայաստանում: Համագործակցության սկիզբը դրվել է հայկական կողմի հետ անցած տարի ստորագրված Համագործակցության մտադրությունների մասին հուշագրով:
Գո Տիանմինը ՀՀ փոխվարչապետին ներկայացրեց Հայաստանում իրականացվելիք առաջիկա ծրագրերն ու անելիքները, անդրադարձավ զարգացման հեռանկարներին: Ընկերությունն աշխատում է “ՎիվաՍել-ՄՏՍ” ընկերության հետ, սակայն մտադիր է ընդլայնել գործունեությունը: Զրուցակիցները քննարկեցին համագործակցության ուղղությունները: Մասնավորպես, անդրադարձ եղավ Հայաստանում ինովացիոն ծրագրերի ստեղծման և մշակման կենտրոններ հիմնելու, Երևանի քաղաքապետարանի հետ ծրագրեր իրականացնելու հնարավորություններին և այլ հարցերի: Ա. Գևորգյանը ողջունեց ընկերության մտադրությունները և պատրաստակամություն հայտնեց աջակցել նոր նախաձեռնություններին:
«Հուավեյը» դինամիկ զարգացող ընկերություն է և մտադիր է հեռահաղորդակցական տեխնոլոգիաների համաշխարհային շուկայում առաջիկա տարիներին զբաղեցնել առաջին տեղը:
