Լուսանկարը՝ Armeniasputnik-ի
Ֆինանսների նախարար Տիգրան Խաչատրյանն երեկ ԱԺ-ում խոսել է հնարավոր գնաճի մասին և նշել, որ գնաճի կառավարումը գտնվում է Կենտրոնական բանկի գործիքակազմում և ԿԲ-ն նպատակ ունի գնաճը վերադարձնել օրենքով սահմանված շրջանակների:
«Դա նշանակում է, որ 2022 թվականի արդյունքով գնաճը կլինի 5.5 տոկոսի սահմաններում, հնարավոր է նաև 1.5 տոկոս շեղում: Կենտրոնական բանկը հայտարարել է, որ այդ արդյունքային ցուցանիշները շարունակում են մնալ իրագործելի և չնայած այն ժամանակավոր դժվարությունների, որոնք առկա են այսօր տարածաշրջանում և աշխարհում պայմանավորված հատկապես սննդամթերքի և էներգակիրների հնարավոր գնային փոփոխություններով, լինելու են կառավարելի և մենք տարեվերջում ունենալու ենք օրենքով սահմանված փաստացի արձանագրված գնաճ», -լրագրողների հետ ճեպազրույցում նշել է Տիգրան Խաչատրյանը:
Էկոնոմիկայի նախկին նախարար Բանկերի միության նախկին նախագահ, տնտեսագետ Արմեն Եղիազարյանը «Առաջին լրատվական»-ի հետ զրույցում նշեց, որ եթե գնաճը տնտեսական աճից բարձր է, ապա, ըստ էության, անկում է գրանցվում. «Գնաճը հարաբերում ենք ՀՆԱ նոմինալ աճի տեմպին: Եթե գնաճը բարձր լինի, նշանակում է կենսամակարդակը կնվազի: Իսկ այս պահին անհնար է կանխատեսել, թե ինչ գնաճ կունենանք: Դա էականորեն կախված է նրանից, թե ինչ տեղի կունենա Ռուսաստանում: Ընդհանուր առմամբ շատ հավանական է, որ կենսամակարդակի անկում կլինի»,-ասաց նա:
Նախկին նախարարը նկատեց, որ Ռուսաստանը խնդիր ունի պատժամիջոցների պատճառով երկրից դուրս թռած ապրանքներն ինչ-որ ձևով փորձի ներմուծման փոխարինում անել. «Ինչ-որ տեղ կկարողանա, ինչ-որ տեղ՝ ոչ: Իսկ Ուկրաինան պատերազմից հետո լրիվ կերպով կֆինանսավորվի, արագ կվերականգնվի: Միայն կարճաժամկետ խնդիրներ կունենա: Կարող է ռուսական փողերն օգտագործեն, կարող է՝ չօգտագործեն, բայց Ուկրաինան եթե դիմանա ռազմական առումով, տնտեսական խնդիր չի ունենա: Իսկ ռուսները պրոբլեմ կունենան՝ պատժամիջոցների հետ կապված:
Ռուսաստանում ռուբլին անկում է ապրել, 10-14 տոկոս տնտեսական անկում են կանխատեսում: Անկում ամենայն հավանականությամբ կլինի, որովհետև զգալի պատժամիջոցների տակ է»,-ընդգծեց Արմեն Եղիազարյանը:
Ինչ վերաբերում է Հայաստանին նա նկատեց, որ բնական է, որ քանի որ ռուբլին թուլանում է, դրամն արժևորվում է, ՌԴ-ից տրանսֆերտների ծավալը դրամով կպակասի. «Ինձ ավելի շատ հուզում է առևտրային հարաբերությունների խնդիրը, որը, ինչքան ես եմ հասկանում, այս պահին կարգավորված չէ: Պետք է նստել, աշխատել ռուսների հետ, թե ոնց ենք առևտուր անելու, ինչ փողով ենք գազ առնելու, ռուբլին հնարավո՞ր է դրա համար օգտագործել, թե՞ ոչ: Կամ ի՞նչ ենք անելու այն ռուբլու հետ, որ հոսում է Հայաստան: Հիմա չես կարողանում ռուբլին դոլարի կոնվերտացնես, արգելվել է: Բազմաթիվ հարցականներ կան, մինչև այդ հարցերը չլուծվեն, հնարավոր չի ոչինչ անել: Ես կարծում եմ, որ անմիջական լուծումն այն կլինի, որ թողնեն ռուբլին էլ օգտագործեն արտաքին կապերում: Պետք է բանակցել ամեն ինչի շուրջ, ես չունեմ տեղեկատվություն՝ դա արվում է, թե ոչ»:
