«Յուրաքանչյուր շուրջերկրյա ճանապարհորդություն սպորտ է, մենք յուրաքանչյուրս սպորտի վարպետներ ենք դարձել ՝ անցնելով երեք օվկիանոսներով, հինգ մայրցամաքներով, սփյուռքի հայաշատ վայրերով»,- այսօր լրագրողների հետ հանդիպմանն ասաց «Արմենիա» նավի անձնակազմի անդամ Զորի Բալայանը։ Նրա խոսքով՝ իրենց հաջողվել է սարսափելի եղանակային պայմաններում բոլոր անմեղ զոհված մարդկանց հիշատակին նվիրված պղնձե խաչ դնել դժվարամատչելի Հորն հրվանդանում ու թողնել տարբեր լեզուներով գրություններ:
Զ. Բալայանը տեղեկացրեց նաև, որ ցանկություն կա ապագայում ճանապարհորդությունը շարունակել դեպի Չինաստան ու Ճապոնիա: Լրագրողներից մեկի այն դիտարկմանը, թե որքանով է արդարացված, որ մարդիկ այստեղ հնարավորություն չունեն ապրելու, իսկ իրենք առագաստանավով շրջում են, Զորի Բալայանը պատասխանեց, թե իրենք պետությունից փող չեն վերցրել:
«Ես արդեն 3 հատոր գրել եմ «Կիլիկիայի» մասին, գրելու եմ նաև «Արմենիայի» մասին, ու բարերարների անունները կհրապարակվեն գրքում»,- նշեց նա՝ հավելելեվ, թե իրենց ընտանիքները Հայաստանում ստացել են աշխատավարձ:
Նավապետ Սամվել Կարապետյանի խոսքով՝ այս ճանապարհորդության պատմական նշանակությունն այնքան կարևոր է, որ իրենց հաջողվեց անգամ 94 % մուսուլման բնակչությամբ Ինդոնեզիայում գտնել հայկականության հետքեր: «Աշխարհը հայերին չգիտի, և սա շատ լավ հնարավորություն էր հայերին ճանաչելու համար»,- նկատեց նավապետը՝ ընդգծելով, թե ճանապարհորդության ընթացքում հաստատվել են նաև բիզնես կապեր, որոնք իրենք կփորձեն օգտագործել ի շահ երկրի բարօրության:
«Արմենիան» իր շուրջերկրյա ճանապարհորդությունը սկսել է 2009 թ. մայիսի 28-ին՝ Վալենսիայից, անցել է 23 պետություններով, կտրել 42 հազար մղոն (50 հազար կմ), երկու անգամ հատել հասարակածը:
Զ.Բալայանի խոսքով՝ ճանապարհորդության ավարտը կարելի է համարել 2011 թ. օգոստոսի 5-ի գիշերվա ժ. 5:00-ը, երբ «Արմենիան» Կարմիր ծովից մտել է Միջերկրական ծով:
«Արմենիայի» անձնակազմը հայրենիք է ժամանել օգոստոսի 11-ին:
