«Եթե ամերիկյան կողմը իրատես լինի, լավ համաձայնագիր կստորագրվի». Աբդոլլահյան

Չինացի գործընկերոջ հետ հեռախոսազրույցում Իրանի ԱԳ նախարարն ասել է, որ եթե ամերիկյան կողմը իրատեսություն դրսևորի, Վիեննայում, բոլոր բանակցող կողմերի աջակցությամբ, հնարավոր կլինի ստորագրել ամուր և երկարաժամկետ համաձայնագիր։

Իրանի ԱԳ նախարար Հոսեյն Ամիր Աբդոլլահյանը, Չինաստանի ԱԳ նախարար Վան Յիի հետ հեռախոսազրույցում անդրադառնալով Վիեննայում Իրանի նկատմամբ պատժամիջոցների վերացման շուրջ բանակցություններում առկա վիճակին, նշել է, որ Չինաստանի մոտեցումը կառուցողական է։

Ընդգծելով Իրան-Չինաստան հարաբերությունների կարևորությունն՝ Աբդոլլահյանը ընդգծել է երկկողմ հարաբերությունների համակողմանի զարգացման անհրաժեշտությունն ու հավելել, որ դա Իրանի կառավարության արտաքին քաղաքականության հիմնական և առաջնահերթ առանցքներից մեկն է:

Անդրադառնալով ՌԴ ԱԳ նախարար Սերգեյ Լավրովի հետ իր հանդիպմանն՝ Ամիր Աբդոլլահյանը նշել է, որ հանդիպմանը քննարկվել են տարբեր հարցեր, և Մոսկվան ընդգծել է հակաիրանական պատժամիջոցների վերացմանն իր աջակցությունը:

Չինաստանի ԱԳ նախարարը նշել է, որ Պեկինի համար շատ կարևոր են Իրանի հետ հարաբերությունների զարգացումը, ու հարաբերությունների ընդլայնման համար որևէ սահմանափակում գոյություն չունի:

Չինաստանի ԱԳ նախարարը ընդգծել է նաև, որ Չինաստանը ողջունում է Վիեննայի բանակցություններն ու աջակցում Իրանի դեմ պատժամիջոցների չեղարկմանը։