Իրանի արտգործնախարար Հոսեյն Ամիր Աբդոլլահյանը երեքշաբթի պաշտոնական այցով կժամանի Մոսկվա՝ խորհրդակցություններ անցկացնելու Գործողությունների համատեղ համապարփակ ծրագրի (ԳՀՀԾ) վերականգնման շուրջ։ Այս մասին երկուշաբթի օրն ասուլիսում հայտարարել է Իրանի ԱԳՆ ներկայացուցիչ Սաիդ Խատիբզադեն։
Միջուկային համաձայնագրի շուրջ խորհրդակցությունները շարունակվում են տարբեր մակարդակներով։ ՀԳՀԾ-ի անդամ երկրների արտգործնախարարությունները և ԱԳ նախարարները կապի մեջ են միմյանց հետ: Այսպիսով, Ամիր Աբդոլլահյանը վաղը կմեկնի Մոսկվա՝ շարունակելու այդ խորհրդակցությունները։
Ուրբաթ օրը Վիեննայում միջուկային գործարքի շուրջ երկխոսության մասնակիցները հայտարարեցին բանակցային գործընթացի դադարեցման մասին։ Մասնակիցների պատվիրակությունները խորհրդակցությունների համար վերադարձան իրենց երկրների մայրաքաղաքներ:
Փետրվարի 8-ին Վիեննայում, ընդմիջումից հետո, վերսկսվեց բանակցությունների ութերորդ փուլը՝ նպատակ ունենալով վերականգնել միջուկային գործարքն՝ իր սկզբնական տեսքով, և ԱՄՆ-ին վերադարձնել այդ բազմակողմ համաձայնագրին։ Աշխատանքներն իրականացվում են Իրանի, Ռուսաստանի, Մեծ Բրիտանիայի, Գերմանիայի, Չինաստանի և Ֆրանսիայի կազմած համատեղ հանձնաժողովի շրջանակներում, նաև՝ ԱՄՆ-ի հետ առանձին խորհրդակցությունների ձևաչափով, առանց Թեհրանի մասնակցության, որը դեռևս պատրաստ չէ ամերիկյան կողմի հետ ուղիղ երկխոսության։
Բանակցողները ավելի վաղ պայմանավորվել էին արագացնել համաձայնագրի նախագծի վրա աշխատանքի գործընթացը։ Ենթադրվում է, որ խորհրդակցությունների ութերորդ փուլը կարող է վերջինը լինել։
