Ռուսաստանի նախագահ Վլադիմիր Պուտինը Ռեջեփ Թայիփ Էրդողանի հետ հեռախոսազրույցում տեղեկացրել է, որ դեմ չէ հանդիպել Ուկրաինայի նախագահ Վլադիմիր Զելենսկու հետ, հայտնել է Թուրքիայի արտգործնախարար Մևլութ Չավուշօղլուն։
Դիվանագետը պատմել է, որ Անկարան ջանքեր է գործադրում պետությունների ղեկավարների հանդիպումը կազմակերպելու համար։ Նրա խոսքով՝ նման նախաձեռնություն եղել է նաև նախքան Ուկրաինայի տարածքում Ռուսաստանի ռազմական գործողության մեկնարկը։
«Ուկրաինական կողմը պատրաստ է։ Կողմերը Բելառուսում տեխնիկական հարցերն են քննարկում»,-ասել է Չավուշօղլուն։
Էրդողան-Պուտին հեռախոսազրույցը կայացել էր մարտի 6-ին։ Մինչ այդ հայտնի էր դարձել, որ Էրդողանի հետ հեռախոսազրույցի ընթացքում Զելենսկին Պուտինի հետ Անկարայում կամ Ստամբուլում հանդիպելու պատրաստակամություն էր հայտնել։
