ՀՀ ԱԱԾ-ն օրերս բացահայտել ու չեզոքացրել է հերթական օտարերկրյա հատուկ ծառայությունների աշխատակիցների կողմից Հայաստանի և Արցախի Հանրապետություններում ստեղծված հերթական գործակալական ցանցի գործունեությունը, որի կազմում ներգրավված են եղել զինված ուժերի տարբեր ստորաբաժանումներում ծառայության մեջ գտնվող անձինք, ինչպես նաև նախկին զինծառայողներ և Արցախի պետական մարմինների որոշ աշխատակիցներ։
Նրանք օտարերկրյա հատուկ ծառայությունների աշխատակիցներին տեղեկություններ են տրամադրել Արցախում և Հայաստանում տեղակայված ռազմավարական նշանակություն ունեցող օբյեկտների, ռազմական տեխնիկայի, զորամասերի, սպառազինության, ռազմամթերքի, զինվորականների, նրանց թվի և տեղակայման վայրերի, մարտական դիրքերի, պետական և ծառայողական գաղտնիք կազմող փաստաթղթերի և այլնի վերաբերյալ։
Գործակալական ցանցում ընդգրկված որոշ անձինք նախապես տեղեկացված են եղել նաև Արցախի դեմ սպասվող պատերազմի և դրա հստակ օրվա մասին, որով պայմանավորված օտարերկրյա հատուկ ծառայությունների ներկայացուցիչների առաջադրանքով, մինչև պատերազմի սկսվելը նրանց են փոխանցել նաև Արցախի տարածքում տեղակայված հակաօդային պաշտպանության միջոցների տեսակների, քանակի, գտնվելու վայրերի, բարձրագույն հրամանատարական կազմի կենսորոշիչ տվյալների մասին, որով հակառակորդին պատերազմն սկսելուց առաջ ընձեռել են իրական հնարավորություն կատարելու ուժերի և միջոցների ճշգրիտ հաշվարկներ, իրականացնել թիրախավորված հարվածներ, շարքից հանել հակաօդային պաշտպանության միջոցները, ոչնչացնել ռազմավարական նշանակություն ունեցող պահեստները:
Այս առնչությամբ ԱԺ պաշտպանության և անվտանգության հարցերի հանձնաժողովի փորձագետ, ՊՆ նախկին խոսնակ Արծրուն Հովհաննիսյանը «Առաջին լրատվական»-ի հետ զրույցում նշեց տեղի ունեցածը ազգային խայտառակություն է, առաջին հերթին ուժային համակարգի խայտառակությունը. «Ինչ-ինչ սխալների պատճառով մեր մեջ հայտնվել են նման մարդիկ: Սա մեր բոլորի ամոթն ու բոլորիս խայտառակությունն եմ համարում: Ի՞նչ անել, որ սա չլինի, բարդ հարց է: Կադրային քաղաքականությունը, հատկապես սպայական և պայմանագրային զինծառայողների մասով, փաստորեն, ունեցել է լուրջ թերություններ, որ այսպիսի մարդիկ են հայտնվել ու դրանք 1-2-ը չեն: Ես անգամ չգիտեմ, թե ինչ հրամանատարական օղակում են եղել այդ մարդիկ: Ես դիտել եմ տեսանյութը, ասում է՝ ես ծառայել են Արցախի պաշտպանության բանակի շտաբում»,-ասաց նա՝ հավելելով, որ բնական է, որ թիրախում եղել են նաև ՀՕՊ համակարգերը:
«Թշնամին եթե պլանավորել է հարձակում, ՀՕՊ կայանքներն առաջնային թիրախներ են, որոնք խոցում են առաջին հերթին: Հետևաբար, գործակալական ցանցում առաջին հերթին հենց դրանց տեղերն են ճշտվում»,-ընդգծեց Արծրուն Հովհաննիսյանը:
Նրա խոսքով, երբ որ կադրային քաղաքականությունը, սպաների ընտրությունը, որակը այն մակարդակի չի լինում, որը պետք է լինի, արդյունքը լինում է այն, ինչը հիմա տեսնում ենք:
Փորձագետը համոզմունք հայտնեց, որ այս տեսակ բացահայտումները սթափեցնող դեր կարող են ունենալ. «Այսքանից հետո այդ մարդիկ պետք է հստակորեն պատժվեն: Ես չեմ կարծում, թե աշխարհում մի հայ կա, որը այս պահին չի համաձայնի, որ նման մարդկանց ամենադաժան պատիժը տան: Իհարկե, այդպիսի բաները պետք է սթափեցնող լինեն: Ընդհանրապես, անվտանգության համակարգը, կոնկրետ զինված ուժերը, սպայական կազմով, պայմանագրային զինծառայողներով կադրերի համալրումը պետք է լրիվ այլ չափորոշիչների, այլ խստության վրա դրվեն, որպեսզի նման բաներն իսպառ բացառվեն»:
Նա նկատեց, որ այս ամենն իրենց դերն ունեցել են պարտության մեջ. «Ցանկացած պետություն, որ հարձակվում է մեկ այլ պետության վրա, իր լրտեսական ցանցն ակտիվացնում է: Դա ևս պատերազմի տիրույթ է, ինչպես օդը, ցամաքը, ջուրը: Լրտեսական ցանցը չափազանց կարևոր է և այս իրավիճակը տարիներ շարունակ մեր բացթողումների հետևանքն է: Ես հուսով եմ, որ գոնե հիմա այսքանից հետո դասեր կքաղենք և խորքային հետևություններ կանենք»:
