Թուրքական Hürriyet թերթի փոխանցմամբ՝ Թուրքիան ԱՄՆ-ին հայտնել է, որ եթե Իսրայելը հրաժարվի Թուրքիայից ներողություն խնդրել նախորդ տարվա մայիսի 31-ին գրանցված «Մավի Մարմարա»-ի միջադեպի կապակցությամբ, ապա դա կհանգեցնի երկու երկրների միջև հարաբերությունների հետագա վատթարացմանը։
Թերթի տվյալներով՝ Թուրքիայի վարչապետ Էրդողանն արդեն իսկ դիտարկում է Իսրայելի հետ քաղաքական ու տնտեսական կապերի խզման հնարավորությունը։
Միևնույն ժամանակ իսրայելական Globes տնտեսական պարբերականը գրում է, որ Թուրքիայից ներողություն չխնդրելու վերաբերյալ Իսրայելի վարչապետ Բենիամին Նեթանյահուի որոշումը վերջնական է։ Իսրայելական կողմը գտնում է, որ այդ ներողությունը ոչ միայն չի հանգեցնի Անկարայի հետ հարաբերությունների կարգավորմանը, այլև միայն կամրագրի Թուրքիայի վարչապետի քաղաքական դիրքերը։
Հիշեցնենք, որ 4 օր առաջ Իսրայելի փոխվարչապետ Մոշե Այալոնը հայտարարեց, որ եթե իրենք ներողություն խնդրեն Թուրքիայից, ապա Էրդողանը կդառնա Կենտրոնական Արևելքի առաջնորդը։
Իսկ ավելի վաղ իսրայելական կողմը հայտարարում էր, որ «Մավի Մարմարա»-ի միջադեպի կապակցությամբ Թուրքիայից ներողություն խնդրելը կնշանակի հանձնվել ահաբեկչությանը։