Ռուսաստանի մի շարք բանկեր, այդ թվում՝ Կենտրոնական բանկը անջատվեց միջազգային ֆինանսական համակարգից՝ SWIFT-ից։ Մոտ մի ամիս առաջ կենտրոնական բանկի նախագահ Մարտին Գալստյանը ասել էր՝ SWIFT համակարգից Ռուսաստանի անջատումը ծանր հետևանքներ կունենա Հայաստանի համար։ Ի՞նչ է սպասվում Հայաստանի ֆինանսական շուկային և բանկային համակարգին։
Այս առնչությամբ Էկոնոմիկայի նախկին նախարար Արմեն Եղիազարյանը «Առաջին լրատվական»-ի հետ զրույցում նշեց, որ դեռ վաղ է գնահատականներ տալ, հատկապես հաշվի առնելով, որ այս պահին միայն 4 բանկերի նկատմամբ է սահմանափակումը կիրառվում. «Այս պահին խնդիրը լրիվ առևտրային հարաբերությունների մեջ է: Ռուբլու փոխարժեքի փոփոխությունն ընդամենը թանկացրել է մեր արտահանումը, ու էլի հասկանալի չէ, թե ինչ կարող է լինել»,-ասաց նա:
Արմեն Եղիազարյանը չհամաձայնեց, թե Ռուսաստանը կոլապսային վիճակում է. «Այո, այնտեղ լուրջ բարդություններ կան, հիմնական պրոբլեմն այն է, որ ռեզերվներն են սառեցրել: Բավականին ուժեղ պատժամիջոցներ են սրանք, թե ոնց տակից դուրս կգան, չեմ կարող ասել:
Հիմա Ռուսաստանից Հայաստան եկող տրանսֆերտները կէժանանան և ռուբլով, և դոլարով: Անորոշությունները շատ են, ինչպե՞ս են անելու գործարքները, ռուբլով, թե դոլարով»,-ընդգծեց նա:
Հարցին, թե այս վիճակը դրամի վրա ինչ ազդեցություն կունենա, տնտեսագետը պատասխանեց. «Ես չեմ կարծում, որ սա դրամի վրա ինչ-որ ազդեցություն կունենա: Առևտրի անկումը կարող է դրամի վրա ազդեցություն ունենալ: Ռուբլու այսպիսի կտրուկ անկումը իրենց մոտ ըստ էության, ներմուծումը թանկացնում է, արտահանումը էժանացնում է: Երկրի մրցունակության աստիճանն ավելանում է, այսինքն այստեղ որոշակի դրական ազդեցություն էլ կլինի:
Քանի որ Ռուսաստանը մեր ամենամեծ առևտրային գործընկերն է, ինչ-որ ձևով պետք է հարմարեցնենք իրենց, բայց դա 1-2 օրվա գործ չի, հազարումի գործոնից է կախված: Հարցեր կան, որոնց պատասխանները չունենք, ե՞րբ ռուսները դուրս կգան Ուկրաինայից, ինչ կորուստներով, ինչ պայմաններով, պատժամիջոցները կխստացվե՞ն, թե՞ նույնը կմնան, ոնց են դուրս գալու այս վիճակից: Դժվար է կանխատեսել: Մեզ վրա այդ ամենը կազդի, բայց հիմնականում դրամական հոսքերի տեսակետից: Այսպես որ լինի, գազը կթանկանա»:
Դիտարկմանը, որ Հայաստանը պետք է աշխատանքներ տանի տնտեսության դիվերսիֆիկացման ուղղությամբ, Արմեն Եղիազարյանը նկատեց, որ դա մեկ օրում չի լինում. «Ոյո դրսի հետ առևտուրը պետք է մի քիչ ինտենսիվացնենք, ոչ ԵԱՏՄ-ի հետ, բայց դա մի գիշերում չի լինում: Մեր քաղաքական կախվածությունը հնարավոր չէ արագ փոխել: Պետք է կառավարությունն այս ուղղությամբ մտածի, բա կառավարությունն ինչի՞ համար է»:
