Եգիպտոսում շարունակվում են ցույցերը Իսրայելի դեսպանատան մոտ: Ինչպես հաղորդում է РИА Новости-ն, եգիպտացի ցուցարարներից մեկը բարձրացել է բարձրահարկ շենքի կտուրը, պոկել շենքի վրա ծածանվող Իսրայելի դրոշն ու այրել այն: Ականատեսների վկայությամբ՝ Իսրայելի դրոշի տեղում այժմ հայտնվել է եգիպտականը:
Երբ երիտասարդն իջել է շենքի բակ, ցուցարարները նրան դիմավորել են որպես հերոսի:
Հիշեցնենք, որ Սինայում տեղի ունեցած միջադեպի հետևանքով, երբ իսրայելական ռազմաօդային ուժերը պատահաբար սպանել էին եգիպտացի 5 ոստիկանների, Կահիրեում հարյուրավոր մարդիկ հավաքվել էին Իսրայելի դեսպանատան մոտ և պահանջում էին արտաքսել այդ երկրի դեսպանին:
Դեպքի կապակցությամբ Իսրայելը ներողություն էր խնդրել Եգիպտոսից, ինչը, սակայն, համարվեց ոչ բավարար: Եգիպտոսի իշխանությունները պահանջում են պատժել իրենց ոստիկանների մահվան մեջ մեղավոր անձանց:
