«Այս օրենքը ես գնահատում եմ չափազանց վտանգավոր և վտանգավոր ոչ միայն կրոնական ազատությունները սահմանափակելու առումով, այլ նաև պատժիչ կառույց ձևավորելու իմաստով, որը կզբաղվի ոչ միայն կրոնական կազմակերպություններով, այլ նաև քաղաքական այլ նպատակների համար»,- «Առաջին լրատվական»-ի հետ զրույցում, գնահատելով արդարադատության նախարարության կողմից մշակված և նախօրեին հանրային քննարկմանը ներկայացված «Խղճի և կրոնական ազատությունների մասին» օրինագիծը, կարծիք հայտնեց «Համագործակցություն հանուն ժողովրդավարության» հկ-ի նախագահ Ստեփան Դանիելյանը:
Նա հիշեցրեց, որ դեռևս անցած տարի արդարադատության նախարարությունում ստեղծվել է մի կառույց, որը պետք է վերահսկի կուսակցությունները, հասարակական կազմակերպությունները, ինչպես նաև կրոնական կազմակերպությունները, եթե, իհարկե, ներկայացված օրենքն ընդունվի. «Այստեղ վտանգ կա, որ այդ մարմինն ապագայում կդառնա քաղաքական ոստիկանություն: Իսկ նոր օրենքում տրված են մեծ հնարավորություններ միջամտելու կրոնական կազմակերպությունների գործերին»:
Դանիելյանը նշեց, որ օրենքում կան անհեթեթ կետեր` մասնավորապես կրոնական կազմակերպությունների պարտադիր գրանցման, դրանց գործունեությունը դադարեցնելու վերաբերյալ: Նրա խոսքերով՝ պարտադիր գրանցումը միանշանակ մարդու իրավունքների երվրոպական կոնվենցիաների խախտում է:
Հարցին, թե այդ դեպքում ի՞նչ հիմքով է նախարարության ներկայացուցիչը հայտարարում, որ նոր օրինագծով իրենք հրաժարվել են ԽՍՀՄ-ից մնացած և ներկայումս գործող օրենքում առկա տոտալ վերահսկողությունից, Դանիելյանն ասաց, որ օրինագծի որոշ կետերի համար, իհարկե, նման բան կարելի է ասել, քանզի գործող օրենքը չէր համապատասխանում Սահմանադրությանը. «Օրինագծի որոշ կետեր կարելի է առաջընթաց համար՝ ի տարբերություն գործող օրենքի»:
Ստեփան Դանիելյանը առանձնացրեց պետության և Հայ առաքելական եկեղեցու հարաբերությունները կարգավորող փոփոխությունները և նշեց, որ այնտեղ չափազանց անհեթեթ մի դրույթ կա, որով եկեղեցուն մենաշնորհ է տրված՝ բարեգործություն, բարոյական կրթություն իրականացնելու համար. «Սրանք, իհարկե, հիմարություններ են, և դրանցից պետք է ձերբազատվել, քանզի մեզ համար դրանք հիմարություններ են, բայց երբ ժամանակը գալիս է, շատ մարդիկ այդ հիմարություններն օգտագործում են որպես ճնշելու, ուրիշի իրավունքները սահմանափակելու միջոց»:
Ստեփան Դանիելյանի կարծիքով՝ օրինագծի որոշ կետերի վերաբերյալ Վենետիկի հանձնաժողովի գնահատականը կլինի դրական, իսկ մյուս կետերի վերաբերյալ կլինի շատ սուր քննադատություն:
