Հայ ազգային կոնգրեսի մաս կազմող «Հայրենիք ու պատիվ» կուսակցության նախագահ Գառնիկ Մարգարյանի խոսքերով՝ իշխանությունները պետք է բոլոր երեք երիտասարդին էլ ազատ արձակեին, իսկ մեկին պահելը, Մարգարյանի կարծիքով, նշանակում է, որ իշխանությունները ցանկանում են ժամանակ ձգել. «Տիգրանին դիտավորյալ պահել են անազատության մեջ, որպեսզի ժամանակ շահեն, ձգձգեն, և երկխոսությունը հասցնեն փակուղու, որը, սակայն, իրենց չի հաջողվելու»:
«Առաջին լրատվական»-ի հետ զրույցում Գառնիկ Մարգարյանը նկատեց, որ երկխոսության դադարեցման պարագայում, իշխանությունները դրանում ՀԱԿ-ին կմեղադրեն, սակայն ինքը համոզված է, որ դա իշխանություններին չի հաջողվի:
Նա շեշտեց, որ իշխանությունը պետք է հասկանա, որ ՀԱԿ-ը վճռական է տրամադրված, և ՀԱԿ առաջնորդ Լևոն Տեր-Պետրոսյանը հայտարարել է, որ սեպտեմբերին մոբիլիզացնելու են ժողովրդին և գնալու են վճռական քայլերի՝ այս իշխանություններից ազատվելու համար:
Գառնիկ Մարգարյանը կարծիք հայտնեց, որ Տիգրանի անազատությունը կազդի երկխոսության ընթացքի վրա, քանզի Տիգրանը քաղբանտարկյալ է. «Իմ կարծիքով, քաղբանտարկյալի առկայության դեպքում այս ռեժիմի հետ երկխոսելու հարցը այլևս չի կարող քննարկվել»:
