Ադրբեջանական գերությունից վերադառնալուց անմիջապես հետո ազատությունից զրկված զինծառայող Սերժիկ Ամիրխանյանն ազատ է արձակվել կալանքից։ Տեղեկությունը ֆեյսբուքյան իր էջում հրապարակել է իրավապաշտպան Ռուբեն Մելիքյանը։
««Գերիների գործով» մեր երկրորդ վստահորդը՝ Սերժիկ Ամիրխանյանը, այսօր վերադարձավ ազատության: Նա 84 օր կալանված էր. նախ՝ ադրբեջանական, ապա՝ հայկական բանտում»,–գրել է նա։
Մելիքյանի խոսքով` թշնամական գերության մեջ նրանց անցած տառապանքը պետք է ինքնին բացառեր կալանքը Հայաստանում։
Հիշեցնենք, Երևանի ընդհանուր իրավասության առաջին ատյանի դատարանը հունվարի 31-ին ընդունած որոշմամբ մերժել է Սերժիկ Ամիրխանյանի կալանքի ժամկետը երկարացնելու վերաբերյալ նախաքննական մարմնի ներկայացրած միջնորդությունը։ Իսկ կալանավորման մասին նախորդ որոշման ժամկետն ավարտվում է փետրվարի 6-ին։
Կալանքի ժամկետն ավարտվում է նաև գերությունից վերադարձած և ՀՀ–ում ձերբակալված Արեն Արամյանի համար, որի վերաբերյալ նույնպես դատարանը կալանքը չերկարացնելու որոշում էր կայացրել։
Հիշեցնենք նաև՝ 2021թ–ի դեկտեմբերի 4-ին Ադրբեջանը Հայաստանին էր փոխանցել նոյեմբերի 16-ին Սյունիքի սահմանին տեղի ունեցած մարտերի ժամանակ գերեվարված 10 հայ զինվորականի, որոնց թվում էր նաև Սերժիկ Ամիրխանյանը։ Նրանք մեղադրվում են ՀՀ քրեական օրենսգրքի 365-րդ հոդվածի 3-րդ մասով (մարտական հերթապահության կամ մարտական ծառայություն կրելու կանոնները խախտելը, որն առաջացրել է ծանր հետևանքներ)։
