Ռուսական Ռեգնում գործակալության գլխավոր խմբագիր, ռուսաստանցի քաղաքագետ Մոդեստ Կոլերովը «Առաջին լրատվական»-ի հետ զրույցում անդրադառնալով Արցախի խորհրդարանի նախաձեռնությանը՝ ընդունել նախագիծ Ադրբեջանի կողմից օկուպացրած տարածքների վերաբերյալ, նշեց, որ դա Արցախի ներքին խնդիրն է և Մոսկվայի կողմից դրան որևէ արձագանք չի լինի․ «Դուք գիտեք, որ Ռուսաստանի ու Լեռնային Ղարաբաղի իշխանությունների միջև չկան քաղաքական հարաբերություններ։Այն չի զբաղվում պետականաշինությամբ, այնպես որ կհամարենք, որ այդ հարցը կմնա Լեռնային Ղարաբաղի ներքին խնդիր»,-ընդգծեց Կոլերովը։
Մեր այն դիտարկմանը, թե այդ օրենքի նախագծում հնարավոր է տեղ գտնեն այն տարածքները, որոնք 2020 թվականի նոյեմբերի 9-ի համաձայնագրով անցել են Ադրբեջանի վերահսկողության տակ, իսկ Ռուսաստանն այդ համաձայնագրի երաշխավորն է, Մոդեստ Կոլերովն արձագանքեց․ «Ես չեմ կասկածում, որ հենց այդպես էլ կլինի։ Բայց ուզում եմ շեշտել, որ Ռուսաստանը հանդիսանում է անվտանգության երաշխավոր, ռուսական զորքերը կանգնած են Լեռնային Ղարաբաղում և ապահովում են բնակչության անվտանգությունը։ Իսկ այն օրենքները, որոնք ընդունում է Արցախի խորհրդարանը, կրկնում եմ, Արցախի ներքին խնդիրն են և որևէ կերպ Ռուսաստանին չեն առնչվում»,-եզրափակեց նա։
