Գեղարքունիքի մարզի Շողակաթ համայնքում ավարտվել է անասնագլխաքանակի հաշվառումը։
Ինչպես տեղեկացրին Շողակաթի համայնքապետարանի աշխատակազմից, 2022 թվականի հունվարի դրությամբ համայնքում հաշվառվել է 3 645 գլուխ խոշոր, 6 408 գլուխ մանր եղջերավոր անասուն, 86 գլուխ խոզ, 83 ձի, 692 մեղվաընտանիք, 4 227 թեւ թռչուն։ Նախորդ տարվա հունվարի համեմատ խոշորի գլխաքանակը նվազել է 123-ով, խոզերի գլխաքանակը՝ 134-ով, մեղվաընտանիքների քանակը՝ 63-ով, թռչունների քանակը՝ 1 040-ով։ Փոխարենը 570 գլխով ավելացել է մանր եղջերավորների, 21-ով՝ ձիերի քանակը։ «Անասնագլխաքանակի եւ թռչունների նվազումը հիմնականում պայմանավորված է կերի պակասով։ Գլխաքանակը պահպանվել է այն չափով, ինչ չափով անցած գյուղատնտեսական տարվա երաշտի պայմաններում տնտեսությունները կարողացել են անասնակեր ձեռք բերել։ Որքան շուտ սկսվի արոտի շրջանը, այնքան տնտեսությունները շուտ կհաղթահարեն դժվարությունները։ Անասնահամաճարակների դեմ պայքարի միջոցառումները շուտով կմեկնարկեն եւ կընթանան նախատեսված ժամանակացույցին համապատասխան»,- նշեց Շողակաթ համայնքի ղեկավար Սուլիկո Շուշանյանը։