Վերաքննիչ վարչական դատարանը մերժեց «Լուսավոր Հայաստան» կուսակցության վերաքննիչ բողոքը: Արդյունքում ստացվում է այնպես, որ այս պահին Վանաձորում ավագանու նիստ հրավիրելու և համայնքի ղեկավար ընտրելու համար խոչընդոտ և արգելք չկա։
Ինչպես հայտնի է՝ ամենաշատ քվեներ ստացած Վանաձորի համայնքապետի թեկնածու Մամիկոն Ասլանյանը չունի բացարձակ մեծամասնություն և ընտրվելու համար նրան կամ որևէ այլ հնարավոր թեկնածուին անհրաժեշտ է քաղաքական պայմանավորվածություն կամ կոալիցիա։ Մամիկոն Ասլանյանի դեմ, հիշեցնենք, քրեական գործը հարուցվել է 2021թ. սեպտեմբերի 14-ին։ ՔԿ-ի փոխանցմամբ՝ փաստական տվյալներ են ձեռք բերվել, որ Մամիկոն Ասլանյանը Վանաձոր քաղաքի կոնկրետ հասցեների նպատակային նշանակությունը փոխել է՝ բնակավայրերի նպատակային նշանակության հողերից դրանք դարձնելով էներգետիկայի, տրանսպորտի, կապի և կոմունալ ենթակառուցվածքների օբյեկտների նպատակային նշանակության հողերի, իսկ գործառնական նշանակությունը՝ հասարակական կառուցապատման հողերից՝ կոմունալ ենթակառուցվածքների գործառնական նշանակության հողերի, որի լիազորությունը չի ունեցել. արդյունքում պետության և համայնքի իրավունքներին ու օրինական շահերին պատճառվել է անզգուշությամբ ծանր հետևանքներ առաջացրած էական վնաս: Մամիկոն Ասլանյանին վերագրված են նաև այլ արարքներ:
«Առաջին լրատվական»-ի հետ զրույցում ընտրական իրավունքի մասնագետ Վարդինե Գրիգորյանը պարզաբանեց, որ Վերաքննիչ դատարանի որոշումից հետո նախատեսվում է, որ հաջորդ օրվանից ավագանին իր լիազորությունները ստանձնում է, դրանից 20 օր անց ավագանու նիստ հրավիրում․ «Ենթադրում եմ, որ այդ ժամկետները կպահպանեն, չնայած հնարավոր է՝ ավելի շուտ հրավիրեն։ Այսինքն չեմ կարծում, որ 20 օր կսպասեն, ավելի շուտ կհրավիրեն։ Առաջին նիստին պետք է ընտրվի համայնքի ղեկավար»։
Գրիգորյանի խոսքերով՝ օրենսդրությունը նախատեսում է 20 օրյա ժամկետ, բայց այս պահից սկսած ավագանիներն իրենց լիազորությունները ստանձնել են․ «Եթե Վանաձորի ժամանակավոր պաշտոնակատարը իր լիազորությունները պահպանում է՝ հաշվի առնելով, որ հրավիրվել էր արտահերթ նիստ, այս դեպքում պետք է հրավիրի ավագանու նիստ; Եթե չանի, դա կիրականացնի աշխատակազմի ղեկավարը։ Պարզապես մի փոքր տարօրինակ էր, ժամանակավոր պաշտոնակատարն իր լիազորությունները դադարեցրեց, բայց այդ ընթացքում դեռ չկար համայնքի ղեկավար կամ դրա լիազորությունները ստանձնած անձ։ Այնպես որ վստահ չեմ՝ վերջում նորից վերականգնվել է ժամանակավոր պաշտոնակատարի լիազորությունները, թե ոչ։ Բայց կրկնում եմ՝ կա՛մ ինքը պետք է նիստ հրավիրի կա՛մ աշխատակազմի ղեկավարը»։
Մեր զրուցակիցն ընդգծեց՝ քանի որ վանաձորում ոչ մի ուժ չունի բացարձակ մեծամասնություն անհրաժեշտ է կոալիցիա կամ քաղաքական պայմանավորվածություն։ Մեծ հաշվով ստացվում է, որ Վանաձորում իրավական հարցերը կարգավորվել են, մնում է հասնել քաղաքական պայմանավորվածության․«Մամիկոն Ասլանյանն էլ իհարկե առաջադրվելու հնարավորություն ունի՝ չնայած կալանավորված լինելու հանգամանքին։ Որպես ավագանու անդամ ինքը նաև քվեարկելու հնարավորություն պետք է ունենա։ Կալանքի դեպքում օրենքը ոչ մի սահմանափակում չի նախատեսում։ Կալանավորված անձը կարող է լինել ինչպես թեկնածու, այնպես էլ համայնքի ղեկավարի թեկնածու։ Պարզապես այստեղ բնականաբար նա չի կարողանա իր լիազորություններն իրականացնել, կընտրվի փոխքաղաքապետ, նա կիրականացնի այդ լիազորությունները՝ մինչև որ ընտրված համայնքապետի վերաբերյալ որոշում կայացվի»։
