Ինճպես գրում է «Հայկական ժամանակ» օրաթերթը, ՀՀ դատավորների նորացված ցուցակը, որ պաշտոնական փաստաթուղթ է և Սերժ Սարգսյանի կողմից հաստատվել է նախորդ ամիս, էկզոտիկ նմուշ է և շատ բան է պատմում Հայաստանում հաստատված իրողությունների մասին։
«Դատավորների թեկնածուների քրեական մասնագիտացման բաժնում ընդգրկված է ՀՀ գլխավոր դատախազ Աղվան Հովսեփյանի որդին՝ Նարեկ Հովսեփյանը, որը ներկայում աշխատում է ՀՀ ազգային անվտանգության ծառայությունում՝ որպես քննիչ։ Դատավոր է ցանկանում դառնալ նաև ՀՀ ՍԴ նախագահ Գագիկ Հարությունյանի որդին՝ Արտակ Հարությունյանը, որը այժմ Երևանի դատախազությունում ավագ դատախազ է։ Վերջիններիս հետ միասին քրեական մասնագիտացմամբ դատավոր դառնալու հայտ է ներկայացրել նաև ՀՀ պետական պահպանության ծառայության պետ Հրաչյա Հարությունյանի որդին՝ ՀՀ հատուկ քննչական ծառայության քննիչ Դավիթ Հարությունյանը»,- գրում է թերթը։
Ըստ թերթի՝ «ոսկե զավակների» շղթայի էկզոտիկան ՀՀ լեզվի տեսչության պետ Սերգո Երիցյանի որդի Սարգիս Երիցյանն է, ով աշխատում է ՀՀ վճռաբեկ դատարանի քաղաքացիական և վարչական պալատում՝ որպես դատավորի օգնական, բայց ցանկանում է դառնալ քաղաքացիական մասնագիտացմամբ դատավոր։