Ղազախստանի կառավարությունը հրաժարական է տվել երկրով մեկ ծավալվող հանրահավաքների ֆոնին, որոնք երկու-երեք օր առաջ սկսել էին շրջաններից մեկում գազի գնի թանկացման դեմ, սակայն երեկ ըստ էության ստացել էին համապետական մասշտաբ և համալրվել քաղաքական պահանջներով, այդ թվում կառավարության հրաժարականի: Ղազախստանի նախագահը նախօրեին ելույթ ունենալով կոչ էր արել ղազախստանցիներին չտրվել «երկրի ամբողջականությունն ու միասնականությունը քանդելու նպատակ հետապնդող խմբերի կոչերին»: Թե ինչ խմբերի մասին է խոսքը, Ղազախստանի նախագահը չի մանրամասնել:
Հնարավոր է, որ նա ընդամենը դիմել է ամբողջատիրական համակարգերի ինքնապահպանման բնազդի և գիտակցության համար հատկանշական քարոզչական հնարքի, իսկ հնարավոր է նաև, որ սոցիալականն բողոքի առիթով Ղազախստանի հարցում հասունանում է քաղաքական լուրջ ալիք, որը կունենա մեծ հետևանքներ: Առայժմ շատ բարդ է ասել, թե ինչ է կատարվում Ղազախստանում և որքանով կհանդարտեցնի իրավիճակը կառավարության հրաժարականը: Պետք չէ բացառել, որ այն կարող է ոգևորել և բերել արդեն նոր, ավելի բարձր քաղաքական պահանջների: Ղազախստանում հաստատվել է պարետային ժամ, տեղեկություններ կան, որ խոշոր քաղաքներում ոստիկանական որոշ խմբեր անցել են ցուցարարների կողմը: Եթե Ղազախստանում ծավալվող զարգացումները շարունակվեն և բերեն քաղաքական փոփոխությունների, ապա անկասկած է, որ դրանք ունենալու են ոչ միայն ներքին, այլև արտաքին, միջազգային լուրջ ազդեցություն:
Առավել ևս, որ խիստ ուշագրավ է Ղազախստանում բռնկված ալիքի զուգահեռականությունը առաջիկա օրերին սպասվող ամերիկա-ռուսական, ՆԱՏՕ-Ռուսաստան ձևաչափի բանակցությունների հետ, որտեղ քննարկվելու են անվտանգային երաշխիքների հարցեր և որոնք ուղեկցվում են գրեթե վերջնագրային հռետորաբանությամբ երկու կողմից էլ: Ահա այդ ֆոնին հանկարծ բռնկում է տեղի ունենում Ղազախստանում: Այն կարող է լինել երկրորդ ճակատ Ռուսաստանի թիկունքից, չի բացառվում իհարկե նաև Ռուսաստանի բացած երկրորդ ճակատի հանգամանքը, թեև այդ առումով այնքան էլ պարզ չէ, թե Մոսկվային ինչի համար է պետք անկայունությունը Ղազախստանում՝ ԱՄՆ հետ որոշիչ բանակցությանը զուգահեռ: Հնարավոր է իհարկե, որ Ռուսաստանը կարող է այդպիսով շանտաժի ենթարկել Ղազախստանի կառավարությանը՝ թիկունքում անակնկալներ չունենալու համար: Իհարկե հնարավոր է դիտարկել ամենատարբեր վարկածններ, քանի որ մենք հասկանալիորեն չունենք ստույգ եզրակացությունների համար բավարար տեղեկատվություն:
Մի բան անկասկած է, որ ղազախ հանրության շրջանում կա օբյեկտիվ դժգոհություն այն անձնապաշտ, ամբողջատիրական համակարգի հանդեպ, որ ավելի քան երեք տասնամյակ հաստատված է այդ երկրում: Իսկ այդ դժգոհությունը կարող է լինել քաղաքական ամենատարբեր կայծերի առիթ: Այդ թվում նաև Թոււրքիայիցմ, որի համար ամերիկա-ռուսական, կամ Արևմուտք-Ռուսաստան անվտանգային բանակցությունը կարող է դիտվել ռիսկ, քանի որ պայմանավորվածության պարագայում ԱՄՆ ու ՌԴ-ն կարող են նվազեցնել Թուրքիայի մանևրի հնարավորությունը: Ըստ այմ, Անկարան կարող է օգտագործել իր ազդեցությունը թյուրքալեզու երկրներում, այդ թվում Ղազախստանում՝ մասնավորապես Ռուսաստանի հանդեպ ճնշման համար: Բոլոր դեպքերում անկասկած է, որ Ղազախստանը ևս աշխարհաքաղաքական «վառոդի» տակառ է, առավել ևս Չինաստանի հարևանությամբ, ըստ այդմ իրադարձությունները այդ երկրում կարող են ունենալ բավականին անկանխատեսելի զարգացում: Այդ ամենն անկասկած հեռու չէ Հայաստանից մի շարք առումներով, ըստ այդմ պահանջում է զգոնություն և աչալրջություն:
