Չորեքշաբթի օրը նավթի գները իջել են ԱՄՆ տնտեսության համար ներդրողների մտավախությունների ֆոնի վրա. վկայում են աճուրդի տվյալները:
WTI մակնիշի հում նավթի սեպտեմբերյան ֆյուչերսի գինը Նյու Յորքի էլեկտրոնային աճուրդում իջել է 1.53 դոլարով, կամ 1.75%-ով, մինչև 86.05 դոլար՝ բարելի համար: Հյուսիսային ծովի Brent մակնիշի նավթի խառնուրդի գինը ընկել է 1.02 դոլարով կամ 0.92%-ով` կազմելով 109.58 դոլար՝ բարելի համար:
«Հաշվի առնելով ողջ շուկայի անորոշությունը՝ Եվրոպայի պարտքային ճգնաժամը և ԱՄՆ-ի հետ կապված վատ կանխատեսումները` նավթի գները կարող են ցույց տալ բացասական զարգացում հաջորդ շաբաթ»,- մեջբերում է Bloomberg-ը Bayerische Landesbank-ի փորձագետ Գերիտ Զամբոյին:
Ինչպես հայտնի դարձավ չորեքշաբթի օրը, ԱՄՆ արտադրողների գների բարձրացումը սեզոնային տատանումների վերացումից հետո՝ 2011 թվականի հուլիսին կազմել է 0.2%՝ հունիսի համեմատությամբ: Տարեկան կտրվածքով անցած ամսվա ցուցանիշն աճել է 7.2%-ով: Վերլուծաբանները քննարկվող ժամանակաշրջանում սպասում էին 0.1% գների աճ՝ հունիսի համեմատ և 7%` տարեկան կտրվածքով:
