Հայաստանի կառավարության պետական պարտքի ցուցանիշը մտահոգիչ ցուցանիշ սկսել է գրանցել 2020 թվականից և այն մինչ օրս պահպանվում է: Բանն այն է, որ այն հատել է 60 տոկոսի սահմանագիծը:
Հիշեցնենք, որ կառավարության պարտքը 2008-ից սկսած մինչև 2017 թվականը անընդհատ աճել է և 2017-ի տվյալներով կազմել է ՀՆԱ-ի 53,7 տոկոսը: 2018-ին նոր իշխանությունների գալուց հետո պարտքը սկսել է նվազել և 2019-ին արդեն 49,9 տոկոսի էր հասնում: Սակայն 2020 թվականին կապված կովիդով և պատերազմով, կառավարության պարտքը կտրուկ թռիչք է կատարել՝ աճելով 13,6 տոկոսով և կազմելով ՀՆԱ-ի 63,5 տոկոսը:
Ֆինանսների նախարարությունը կանխատեսում է, որ 2021 թվականի ավարտին Կառավարության պարտքը կկազմի ՀՆԱ-ի 60.8%-ը, իսկ արդեն 2022 թվականին՝ 60.2%-ը և մինչև 2026 թվականը կապահովվի 60%-ից ցածր մակարդակ:
Թեև կառավարությունը լավատես է, սակայն փաստն այն է, որ այս տարվա 10 ամիսների ընթացքում պետական պարտքը 15.6%-ով աճել է. հոկտեմբերի վերջի դրությամբ այն 9 մլրդ 209 մլն դոլար է։
Ինչպես վկայում են Ֆինանսների նախարարության տրամադրած տվյալները, այս տարվա առաջին տասը ամիսների ընթացքում պարտքն աճել է մոտ 1 մլրդ 241 մլն դոլարով կամ 15.6%-ով։
Կանխատեսվում է, որ առաջիկա տարիներին պարտքը կշարունակի աճել, սակայն Կառավարությունը հույս ունի, որ նույն ընթացքում տնտեսական աճն ավելի բարձր տեմպեր կգրանցի, և պարտքի բեռը կթեթևանա։
Ազգային ժողովի տնտեսական հարցերի հանձնաժողովի փոխնախագահ Բաբկեն Թունյանը այս առնչությամբ «Առաջին լրատվական»-ի հետ զրույցում նշեց. «Պետական պարտքը բացարձակ թվով միշտ աճելու է, և դրանում վատ բան չկա։ Այլ հարց է, թե ՀՆԱ-ի նկատմամբ ինչ տոկոս է լինելու։ Դա էլ բյուջեով հստակ ֆիքսված է, և նախատեսված է, որ հաջորդ տարի հետ ենք գալու ՀՆԱ-ի 60 տոկոսի շրջանակներում»:
Դիտարկմանը, որ երբ իրենք եկան իշխանության, ՀՆԱ-ի նկատմամբ պետական պարտքը անհամեմատ ցածր էր, քան 60 տոկոսը, Ձեր կանխատեսմամբ՝ մոտավորապես երբ այս ցուցանիշը կհասնի 2018-ի ցուցանիշին, Թունյանն արձագանքեց. «Երբ եկանք իշխանության, այդ հարաբերակցությունը մոտ 60 տոկոս էր, որից հետո երկու տարի հաջորդաբար նվազեց, այսինքն՝ պետական պարտքի բեռը թուլացավ։ 2020-ին օբյեկտիվ պատճառներով՝ պատերազմ, կովիդ, ճգնաժամի արդյունքում պետական պարտքն աճեց, բայց երբ հարցնում եք երբ կվերադառնա, 2022-ի բյուջեով հստակ նշված է, որ հաջորդ տարվա տարեվերջին մենք հետ կգանք 60 տոկոսի մակարդակի»: