Թուրքիայի արտգործնախարար Ահմեդ Դավութօղլուն քառօրյա այցով այսօր կմեկնի ԱՄՆ:
Թուրքական Sabah-ի փոխանցմամբ` Դավութօղլուն ԱՄՆ հասարակական ու քաղաքական շրջանակների հետ ունենալիք իր շփումների ընթացքում ներկայացնելու է Անկարայի մտահոգությունները տարբեր խնդիրների շուրջ: Թուրքիայի արտաքին քաղաքական գերատեսչության ղեկավարը հանդիպելու է ԱՄՆ պետքարտուղար Հիլարի Քլինթոնի, ազգային անվտանգության հարցերով խորհրդական Թոմ Դոնիլոնի և մի շարք կոնգրեսականների հետ:
Sabah-ի վերլուծաբան Էրդալ Շափաքը հրապարակել է 2011թ. ակնկալվող աշխարհաքաղաքական ու տարածաշրջանային զարգացումների մասին իր դիտարկումները: Նա եզրակացրել է, որ Թուրքիա-ԱՄՆ հարաբերությունների ճգնաժամը դեռ մեկ տարի էլ կտևի: “Պատճառները կլինեն Իրանի միջուկային ծրագիրն ու Իսրայելի հետ Թուրքիայի ունեցած խնդիրները”: Կշարունակեն դանդաղել Թուրքիայի Եվրանդամակցության բանակցությունները, Կիպրոսում լուծման համար վերջին հույսերը կսպառվեն, Հյուսիսային Կիպրոսի Թուրքական Հանրապետությունը կկանգնի ճամփաբաժանի առաջ: Կովկասում որոշ չափով կարգավորում կլինի Ռուսաստանի և Վրաստանի միջև: Լեռնային Ղարաբաղի հարցի լուծման համար դրական քայլեր կիրականցվեն: 2011-ի երկրորդ կեսին նոր զարգացումներ կլինեն Հայաստան-Թուրքիա հարաբերությունների կարգավորման ճանապարհին:
