Թուրքական Zaman թերթի փոխանցմամբ՝ Թուրքիայի հարավարևելյան հատվածում ընկած Հաքքարի-Չուքուրջա ավտոմայրուղում քուրդ զինյալների կողմից սպանված թուրք զինծառայողների քանակը հասել է 11-ի, որոնցից մեկը մայոր է։
Թուրք զինծառայողների ավտոշարասյունը հայտնվել է Թուրքիայում ահաբեկչական հռչակված ու արգելված «Քրդստանի աշխատավորական կուսակցության» (PKK) կողմից ճանապարհին տեղադրված ականների վրա։ Նշվում է, որ ընդհանուր առմամբ PKK-ն ճանապարհին տեղադրել է կես տոննա պայթուցիկ, ինչը գործի է գցել 3 կիլոմետր հեռավորությունից։ Ականները հերթականությամբ պայթեցնելուց հետո PKK-ն նաև հրթիռակոծել է այդ ավտոշարասյունը։
Այս կապակցությամբ Թուրքիայի նախագահ Աբդուլլահ Գյուլը հայտարարել է. «Բոլորը պետք է իմանան, որ չկան պետությունից զորեղ ուժեր։ Եթե որևէ մեկը կարծում է, որ Թուրքիային կարող է ծնկի բերել ահաբեկչության, զենքի, լարվածության և այլ միջոցներով, ապա խիստ սխալվում է։ Դրա արդյունքը տխուր կլինի։
Մենք ի վիճակի ենք ահաբեկիչներին ցուցադրելու պետության ուժը։ Բոլորը կտեսնեն դա։ Ռամադան ամսի ավարտը քննարկման թեմա չէ»։
Թուրքիայի վարչապետ Էրդողանն իր հերթին հայտարարել է, որ Ռամադանի հետ կապված իրենց համբերությունը հատել է և գործելու ժամանակն է։ Իսկ ահա «Ազգայնական շարժում» կուսակցության (ԱՇԿ) նախագահ Դևլեթ Բահչելին առաջարկել է «թոզ ու դումանի» վերածել Ղանդիլում (Հյուսիսային Իրաք) գտնվող PKK-ի բույնը։
Հիշեցնենք, որ PKK-ի հետ կապված՝ Էրդողանը օգոստոսի 15-ին հայտարարել էր. «Ժողովուրդը հիշում է սուրբ Ռամադան ամսին նահատակյալ թուրք զինծառայողներին։ Ահաբեկչական անջատական խմբավորումների նկատմամբ համբերատարություն դրսևորվում է միայն սուրբ ամիսներին։ Դանակն արդեն հասել է ոսկորին, Ռամադանից հետո «խաղաղ գործողությունները» կստանան այլ բնույթ»։