Երուսաղեմի հայոց պատրիարքությունում սկիզբ առած խնդիրը՝ կապված «Կովերի պարտեզի» հետ, շարունակում է լարված պահել համայնքը։ «Կովերի պարտեզը» 99 տարով հրեա գործարարին վարձակալությամբ տալու թույտվությունը ստորագրել են Նուրհան պատրիարքը և Պարետ վարդապետ Երեցյանը:
Երուսաղեմի միաբանները խնդրի հետ կապված բաժանվել են երկու մասին, 17 միաբան հայտարարությամբ հանդես են եկել և պահանջում են չեղարկել պայմանագիրը։ Պատրիարքարանում միաբանների մի փոքր խումբ է աջակցում պատրիարքին։ Այսպիսով, Երուսաղեմի պատրիարքությունում պառակտումը շարունակվում է։ Այս մասին «Առաջին լրատվական»-ի հետ զրույցում նշեցին սաղիմահայերը։
Օրերս միջադեպ է տեղի ունեցել Երուաղեմի Հայ Օգնության Միության (ՀՕՄ) տարեկան վաճառքի ժամանակ։ Միջոցառման ժամանակ, որը նախագահում էր Նուրհան պատրիարքը, Պարետ վրդ. Երեցյանը և Սևան Արք. Ղարիպյանը, որոնք ստորագրել էին «Կովերի պարտեզի» պայմանագրի տակ, սրահ են մտել ցուցարարներ։ Նրանք փորձել են Նուրհան պատրիարքին մի նամակ հանձնել «Կովերի պարտեզի»՝ 99 տարով վարձակալության տալու վերաբերյալ։
«Պատրիարքը մերժեց նամակը ստանալ, և ցուցարանների, պատրիարքի և մի քանի հայրերի միջև, որոնք աջակցում են պատրիարքին վիճաբանություն է սկսվել։ Ցուցարարները գոռացին՝ Նուրհա՛ն, հողատու, Պարե՛տ, հողատու, անամոթներ և այլն»,-ասաց համայնքի ներկայացուցիչը՝ հավելելով, որ ցուցարարներին դուրս են վռնդել շենքից, բայց, իհարկե, պատրիարքը և մյուս հոգևոր հայրերը համայնքում այլևս հեղինակություն չունեն և չեն կարող լռեցնել սաղիմահայերին։
Ի դեպ, ցուցարարների նամակը պատռել է պատրիարքի քարտուղարը հենց ցուցարարների առաջ։
Նուրհան պատրիարքը իր գահակալության ութ տարիների ընթացքում առաջին անգամ մասնակցել է համայնքի այս միջոցառմանը։ Այսպիսիով նա փորձել է համայնքի ներկայացուցիների մոտ արդարանալ, թե ինչու է ստորագրել պայմանագրի տակ և սիրաշահել համայնքի ներկայացուցիչներին։
Սաղիմահայերը նշեցին, որ համայնքում շարունակվելու են ցույցերը՝ փորձելով ճնշում գործադրել պատրիարքին այնքան ժամանակ, քանի դեռ նա չի չեղարկել պայմանագիրը և ստորագրությունը հետ չի կանչել։
Միաբանների և եպիսկոպոսների հայտարարությանն է միացել Արիս արքեպիսկոպոս Շիրվանյանը։ «Առաջին լրատվական»-ի հետ զրույցում նա նշեց, որ 99 տարով տարածքը վարձակալությամբ տալու համաձայնագիրը անօրինական է հենց այն պատճառով, որ որևէ մեկն իրավունք չունի հայկական կալվածքներն 99 տարով վարձակալության տալ, առավելագույն ժամկետը 49 տարին է: Նախկին պատրիարքի ժամանակ էլ այս խնդիրն առաջացել է, և 99 տարին կրճատվել է, առավելագույնը 49 տարով կարող են վարձակալությամբ տրվել Երուսաղեմում հայերին պատկանող հողատարածքները։