«Հարավօսական կոնֆլիկտի երրորդ տարեդարձի առնչությամբ տված Դմիտրի Մեդվեդևի հարցազրույցում հնչեցրած «ավելի լավ է երկար բանակցություններ, քան հնգօրյա պատերազմ» միտքը մեծ վայնասուն առաջացրեց Ադրբեջանում։ Խոսվում էր այն մասին, թե Արևմուտքը Մեդվեդևի շուրթերով ահաբեկում է Ադրբեջանի, թե եթե պատերազմական գործողությունները վերսկսվեն, Արևմուտքը կճանաչի Ղարաբաղի անկախությունը»,- ԼՂ խնդրի շուրջ վերջին զարգացումները գնահատելով՝ լրագրողների հետ հանդիպման ժամանակ նշեց ԱԺ ՀՀԿ խմբակցության պատգամավոր Գագիկ Մինասյանը:
Նա նշեց, որ տարիներ շարունակ Ալիևների կլանը հասարակությանը պատրաստել է, թե որևէ կերպ ինքը չի ճանաչի Ղարաբաղի անկախությունը, ինչը էական խոչընդոտ է կոնֆլիկտի խաղաղ կարգավորման համար, բայց մյուս կողմից էլ ոչ վատ զինատեսակ է Ալիևի համար՝ բանակցությունների սեղանի շուրջ, քանզի նա միշտ կարող է ասել, թե իր ժողովուրդը պատրաստ չէ ԼՂ անկախության ճանաչմանը:
Սակայն, Մինասյանի կարծիքով, Ալիևի այդ հնարքը հայտանբերվել է, և միջազգային հանրությունը դրա հակազդեցությունն ունի, ու դա առաջին անգամ հստակ դրսևորվել է դովիլյան հռչակագրում, երբ նշվեց, որ կողմերը պետք է իրենց ժողովուրդներին պատրաստեն խաղաղության. «Կարծում եմ, այս գործընթացի տրամաբանական զարգացում պիտի լինի այն, որ եռանախագահները կհայտարարեն, որ եթե Ադրբեջանը պատերազմ սկսի, ապա միջազգային հանրությունը կճանաչի Ղարաբաղը»։
Մինասյանը նշեց, որ հայկական կողմի աշխատանքը ևս այս առումով կարևոր է, և պետք է փորձել ներկայացնել, որ Ադրբեջանը հանդես է գալիս ռազմատենչ հայտարարություններով, և եթե պատերազմը վերսկսվի, ապա Հայաստանը կճանաչի Լեռնային Ղարաբաղի անկախությունը:
