NEWSru.co.il կայքի փոխանցմամբ՝ ԱՄՆ պետդեպարտամենտն Իսրայելին կոչ է արել շուտափույթ կարգավորել Թուրքիայի հետ իր հարաբերություններն ու ներողություն խնդրել նախորդ տարվա մայիսի վերջին տեղի ունեցած «Մավի Մարմարա»-ի միջադեպի արդյունքում թուրք քաղաքացիների սպանության համար։
ԱՄՆ-ը Իսրայելին հասկացրել է, որ թուրք-իսրայելական հարաբերությունների հետագա վատթարացումը վնասում է Մերձավոր Արևելքում Վաշինգթոնի շահերին։ Այս մասին հայտարարել է նաև ԱՄՆ պետքարտուղար Հիլարի Քլինթոնը։
ԱՄՆ-ը ցանկանում է դրանով իսկ ստանալ Սիրիայի հարցում Թուրքիայի աջակցությունը։ Անգամ նշվում է, որ ամերիկյան դիվանագետները սպառնացել են իրենց իսրայելցի գործընկերներին՝ ընդգծելով, որ Երուսաղեմի հարցում Իսրայելի համառության պատճառով իրենց դժվար կլինի համոզել «բարեկամական երկրներին»՝ պաղեստինցիներին չաջակցելու համար։
Նշվում է, որ Իսրայելի կառավարությունը ցայժմ չի կողմնորոշվել ներողություն խնդրելու շուրջ։
Հիշեցնենք, որ երեկ թուրքական Radikal թերթը գրել էր, թե Թուրքիան Իսրայելից պահանջում է ներողություն խնդրել և 50.000-ական դոլար փոխհատուցում վճարել «Մավի Մարմարա»-ի միջադեպի արդյունքում զոհված թուրքերի հարազատներին։ Մինչդեռ Իսրայելն ընդդիմանում է դրան՝ հայտարարելով, որ պատրաստ է նրանց վճարել 100.000-ական դոլար փոխհատուցում, սակայն ներողություն խնդրելու փոխարեն գործածել «ցավակցանք» բառը։
