Առաջին լրատվականը ՄԱՀՀԻ հիմնադիր Ստյոպա Սաֆարյանից ստացավ հետևյալ բովանդակությամբ տեքստը որպես ԵԴ/39585/02/19 քաղաքացիական գործով ընդունված վճռի կատարում.
«Անհամաձայն լինելով իմ մասով հրապարակված վճռի հետ, որը դատարանի կողմից ընդունվել էր դատավարական ու նյութական իրավունքի բազմաթիվ նորմերի կոպտագույն խախտումներով, և որի կապակցությամբ այն անցած ամիսներին բողոքարկել էի թե՛ վերաքննիչ դատարանում (բողոքս մասնակի բավարարվել էր ու արձանագրվել էին դատավորի կողմից թույլ տված խախտումները), թե՛ վճռաբեկ դատարանում, որից հետո նաև դատավորի նկատմամբ կարգապահական վարույթ հարուցելու դիմում եմ ներկայացրել Արդարադատության նախարարություն, և քանի դեռ այդպիսի վարույթի մասին տեղեկատվություն հրապարակված չէ, որպես այս պահին ուժի մեջ մտած վճռի կատարում հրապարակում եմ սույն տեքստը՝ վստահ ու համոզված լինելով որ արդարությունը շուտով հաղթելու և վերահաստատվելու է. «29.10.2019թ. Ես՝ Ստյոպա Սերյոժայի Սաֆարյանս, «լկտի» արտահայտության համար ներողություն եմ խնդրում «Լայվ նյուզ մեդիա» ՍՊ ընկերության լրագրող Թագուհի Ասլանյանից»»։
Մեր կողմից հիշեցնենք, որ 2019թ. Հոկտեմբերի 27֊ին Միջազգային և անվտանգության հարցերի հայկական ինստիտուտում ավարտված միջոցառումից հետո, առանց պայմանավորվածության ու հրավերի, Լայվնյուզ կայքի լրագրող ներկայացած Թագուհի Ասլանյանը մուտք էր գործել Ինստիտուտի տարածք և, ի հակառակ հաստատության աշխատակիցների ու հիմնադրի՝ տարածքից դուրս գալու տասնյակ պահանջների ու կոչերի, հրաժարվել էր լքել ՄԱՀՀԻ սրահն ու տարածքը։