Վրաստանի նախկին նախագահ Միխայիլ Սաակաշվիլին իր համակիրներին բանտից կոչ է արել պայքարել «Վրացական երազանքի» իշխանության դեմ, ինչպես Հայաստանի նախկին համակարգի դեմ պայքարեց Նիկոլ Փաշինյանը: Սաակաշվիլին հայտարարել է, թե Փաշինյանը հաղթեց Իվանիշվիլիից չորս անգամ ավելի ուժեղ օլիգարխի: Թե որն է Սաակաշվիլու չափման միավորը, թերևս հետաքրքիր էլ չէ: Հայաստանին շատ ավելի հետաքրքիր է, թե ինչ զարգացումներ են հնարավոր Վրաստանում և դրանք որքանով կարող են սպառնալ այդ երկրի կայունությանը, որը գործնականում միակ հուսալի և հիմնական ցամաքային կապն է Եվրոպայի, ինչպես նաև Հայաստանի առևտրային թիվ մեկ գործընկեր Ռուսաստանի ուղղությամբ: Այն, որ Սաակաշվիլին փորձում է վրաց հանրությանը հանել գործող իշխանության դեմ պայքարի, դա իհարկե նրա, նրա համակիրների, Վրաստանի հանրության գործն է: Բայց, շատ կարևոր է, որ Վրաստանի նախկին նախագահն այդ գործին որևէ կերպ, այդ թվում հռետորաբանության մակարդակում չփորձի խառնել Հայաստանը, Հայաստանի հանրությանը, Հայաստանի իշխանությանը: Նա իր համակիրների, իր թիմի հետ կարող է մշակել իշխանության համար պայքարի ցանկացած մեթոդաբանություն, այդ թվում և այն, ինչ օգտագործեց Հայաստանի հանրությունը 2018 թվականի ոչ բռնի հեղափոխությունն իրականացնելու համար: Թեմայի շուրջ «Առաջին լրատվական»-ը զրուցել է վրացագետ Ջոնի Մելիքյանի հետ: