«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ Պետրոս Մակեյանը։
–Պարոն Մակեյան, «Քաղաքացիական պայմանագիր» կուսակցությունը և Բալասանյան» դաշինքը Գյումրիում կոալիցիոն հուշագիր են ստորագրել, որի համաձայն ՔՊ-ին կանցնի փոխքաղաքապետի և մի շարք բաժինների պետերի պաշտոնները։ Ինչպե՞ս եք գնահատում Գյումրու ընտրությունների այսօրինակ հանգուցալուծումը։
-Ես կարծում եմ, որ գործում է նույն համակարգը՝ ավելի վուլգար ձևով։ Այն, ինչ վերջին երկու-երեք օրերին տեղի է ունենում Գյումրիում՝ ուժի ցուցադրում, ԱԱԾ-ի ակտիվությունն այդ դաշինքի անդամների նկատմամաբ հստակ է։ Ւշխանությունը պարտադրում է իր խաղի կանոնները և նույնն անում է նաև մնացած համայնքներում։ այն ուժերը, որոնք նախկինում ընտրական «տասովկեքի» մեջ են եղել՝ ձայներ են հավաքագրել ընտրակաշառքով կամ իրենց հեղինակությամբ, կրիմինալ ճանապարհով՝ այդ մարդկանց այժմ հավաքագրում են, որպեսզի Գյումրիի ու Գորիսի սխալը չկրկնվի։ Հիմա իրենք նույն սցենարի մեջ են։ Ցավոք սրտի, պետք է արձանագրեմ, որ իրենք գերազանցում են «մերժվածներին»։ Իրենց հիմնական խաղաքարտն այն էր, թե իրենք ընտրություններ են անցկացնում ժողովրդավարական մեխանիզմներով՝ այդպես չէ, նրանք մտել են մերժվածների հարթություն ու գերազանցում նրանց։ Դա նախկինների ոճն էր, իսկ իրենք եկել են իբրև թե այդ ոճը մերժելու համար, բայց մի բան էլ գերազանցեցին։
–Շիրակի մարզպետ է նշանակվելու ՔՊ խմբակցության քարտուղար Նազելի Բաղդասարյանը, իսկ Հովհաննես Հարությունյանը հետ է վերադառնալու Առողջապահության ոլորտ։ Այս փոխատեղումներն ի՞նչ են վկայում։
-Սա նշանակում է արհամարհել ժողովրդին; Իրենց թվերով նույնիսկ Շիրակի մարզն աղքատության թվով առաջատարն է, բարդ ու ծանր մարզ է, դեռևս առկա են տնակներ, աղետի գոտի․․․ այս ամենի կառավարումը տրվում է մի աղջնակի, որի կենսագրությունը եղել է «Ցայգում» խոսել, հետո էլ Ազգային ժողովում պատերազմից հետո իրեն ամբարտավան պահել։ Հիմա նա իր հատուցումն է ստանում։ Նրանք, ովքեր պատերազմից հետո այս խայտառակ իրավիճակում պարտությունը փորձել են պատպանել՝ այսօր Նիկոլ Փաշինյանի կողմից պարգևատրվում են։ Սա դարձել է գործելաոճ։ Ուշադրություն դարձրեք նրա կադրային քաղաքականությանն ու ամեն ինչ հստակ կդառնա։ Ոնց ինքն է երկիր ղեկավարում, այդպես էլ այդ աղջիկը մարզ է ղեկավարելու։ Կապրենք՝ կտեսնենք։
-Նկատի ունեմ՝ այս փոխատեղումները․․ ի՞նչ է ստացվում ՝ իշխանությունը կադրեր չունի՞, որ մարդկանց մի տեղից մյուս տեղ է տանում։
-Կադրերի պակաս երկրում չկա։ Պարզապես Նիկոլ Փաշինյանի պահանջած կադրերը հենց այդ մարդիկ են։ Ինքը չի օգտվում երկրում առկա քաղաքական բազայից, օգտվում է այն մարդկանցից, որոնց ցինիկ ձևով այսօր պաշտպանում են իր շահերը։ Ընդդիմանում են՝ հանրային շահին, պաշտպանում իր անձնական շահը։
–Սա անխուսափելիորեն չի՞ բերելու նրան, որ իշխանությունը սկսի աշխատել արտախորհրդարանական ուժերի հետ։
-Այդ աշխատանքն իմիտացիա է։ Հունիսի 20-ի ընտրությունից հետո ընդդիմության բացը վարչապետը փորձում է լրացնել, այսպես կոչված, արտախորհրդարանական ուժերով։ Ես տեսնում եմ, թե ինչ է կատարվում, չեմ էլ ուզում անդրադառնալ։