«Առաջին լրատվական»-ի տեղեկություններով՝ Աբովյանում դեկտեմբերի 5-ին կայանալիք ՏԻՄ ընտրություններում ԲՀԿ-ն առաջադրում է Գագիկ Ծառուկյանի թիկնազորի պետ Էդուարդ Բաբայանին: Վերջինս արդեն սկսել է լուրջ քարոզարշավի գործընթացը, ամեն քայլափոխի շտաբներ է բացում:
Այստեղ «Քաղաքացիական պայմանագրի» թեկնածուն Պավել Ցուգունյանն է: Վերջինս Ռոմանոս Պետրոսյանի մարզպետ եղած ժամանակ եղել է մարզպետի տեղակալի օգնական:
Հիշեցնենք, որ 2018-ի արտահերթ խորհրդարանական ընտրություններում 2-րդ տեղը զբաղեցրած ԲՀԿ ռեյտինգային թեկնածուներից ամենաշատ ձայնը հավաքել էր հենց Էդուարդ Բաբայանը:
Նշենք, որ Էդուարդ Բաբայանի նկատմամբ քրեական գործ էր հարուցվել 2018-ի հուլիսին, և նա կալանավորվել էր: Նա մեղադրվում էր դիտավորությամբ առողջությանը ծանր վնաս պատճառելու մեջ՝ Քրեական օրենսգրքի 112-րդ հոդվածի 1-րդ մասով։ Օգոստոսին դատարանը Էդուարդ Բաբայանին 20 միլիոն դրամ գրավի դիմաց ազատ արձակեց:
