Հանրահավաք է տեղի ունեցել Թուրքիայի Արդարադատության պալատի դիմաց՝ թուրք իրավապաշտպան Օսման Կավալայի դեմ նոր դատավարության հետ կապված, հաղորդում է ՌԻԱ Նովոստին:
Տասը երկրների դեսպանատներ կոչ են արել Թուրքիային ազատ արձակել Կավալային: Կոչով հանդես են եկել Կանադայի, Ֆրանսիայի, Ֆինլանդիայի, Դանիայի, Գերմանիայի, Նիդերլանդների, Նոր Զելանդիայի, Նորվեգիայի, Շվեդիայի և ԱՄՆ-ի դեսպանատները։
«Իրավապաշտպանի ձերբակալությունից չորս տարի է անցել, և նրա գործի քննության հետաձգումները ստվեր են գցում ժողովրդավարության, օրենքի գերակայության և թուրքական դատական համակարգի թափանցիկության նկատմամբ հարգանքի վրա: Հաշվի առնելով այս գործով Մարդու իրավունքների եվրոպական դատարանի վճիռները՝ կոչ ենք անում Թուրքիային հնարավորինս շուտ ազատ արձակել Կավալային», – ասված է Թուրքիայում ԱՄՆ դեսպանատան տարածած հայտարարության մեջ:
Օսման Կավալան հայտնի թուրք իրավապաշտպան է, Anadolu Kültür AŞ մշակութային հիմնադրամի հիմնադիրը, որն աջակցում է էթնիկ և կրոնական փոքրամասնությունների նախագծերի։
2020 թվականի փետրվարին թուրքական դատարանը արդարացրեց Կավալային՝ կառավարության տապալելու փորձին մասնակցելու գործով, բայց նույն օրը Ստամբուլի դատախազությունը ձերբակալման նոր հրաման արձակեց: Նոր մեղադրանքներ առաջադրվեցին Կավալայի դեմ, այս անգամ ՝ 2016 թվականի հուլիսին Թուրքիայում հեղաշրջման փորձին մասնակցելու համար: