ՆԱՏՕ-ն ի գիտություն է ընդունել ՌԴ ԱԳ նախարար Սերգեյ Լավրովի խոսքերը դիվանագիտական ներկայացուցչությունների փոխադարձ փակման մասին, սակայն դեռևս պաշտոնական ծանուցումներ չի ստացել Ռուսաստանի Դաշնությունից։
«Մենք ի գիտություն ընդունեցինք ԶԼՄ-ներին նախարար Լավրովի հայտարարությունները, սակայն դեռ չենք ստացել բարձրացված հարցերի վերաբերյալ պաշտոնական ծանուցումներ», – ասվում է դաշինքի մամուլի ծառայության հաղորդագրության մեջ:
Բելգիայում Ռուսաստանի դեսպանատունը, որին, ըստ ՌԴ ԱԳՆ ղեկավարի, նոյեմբերի 1-ից կվերապահվեն ՆԱՏՕ -ի հետ հաղորդակցության ապահովման բոլոր գործառույթները, ձեռնպահ մնաց մեկնաբանություններից:
«Այս թեմայով բոլոր անհրաժեշտ հայտարարություններն այսօր արդեն հնչել են Ռուսաստանի արտգործնախարար Սերգեյ Վիկտորովիչ Լավրովի և ԱԳ փոխնախարար Ալեքսանդր Վիկտորովիչ Գրուշկոյի կողմից», – ՏԱՍՍ -ին հայտնել են դեսպանատանը:
Ինչպես երկուշաբթի Մոսկվայում կայացած մամուլի ասուլիսին ասեկ է ՌԴ ԱԳ նախարար Սերգեյ Լավրովը, Ռուսաստանը որոշել է նոյեմբերի 1 -ից դադարեցնել ՆԱՏՕ-ում իր մշտական առաքելության աշխատանքը՝ ի պատասխան առաքելության 8 աշխատակիցների հավատարմագրումը չեղյալ հայտարարելու որոշման: Բելգիայի դեսպանատանը գտնվող ՆԱՏՕ-ի տեղեկատվական գրասենյակը և Մոսկվայում ռազմական կապերի առաքելությունը նույնպես կդադարեցնեն աշխատանքը, ասել է նախարարը: Նրա խոսքով, եթե Հյուսիսատլանտյան դաշինքի ներկայացուցիչները «հրատապ ինչ-որ խնդիրներ ունենան», ապա նրանք կարող են դիմել Բրյուսելում Ռուսաստանի դեսպանին: Նախարարն ընդգծել է, որ Ռուսաստանի Դաշնությունն այլևս անհրաժեշտություն չի տեսնում «շարունակել ձևացնել, որ տեսանելի ապագայում հնարավոր են որոշ փոփոխություններ (դաշինքի հետ հարաբերություններում-խմբ․)»:
Նրա խոսքով, այս քայլը պատասխան էր հոկտեմբերի 6-ին Հյուսիսատլանտյան դաշինքի որոշմանը` ՆԱՏՕ -ում Ռուսաստանի մշտական առաքելության կազմը 20-10 հոգու կրճատելու մասին։ Ռուսներին վերջնաժամկետ է տրվել մինչև հոկտեմբերի վերջ Բրյուսելից հեռանալու համար:
ՆԱՏՕ-ն իր որոշումը բացատրել է նրանով, որ հավատարմագրումից զրկված դիվանագետները, ըստ դաշինքի, հետախույզներ են, որոնց կարգավիճակի մասին Մոսկվան չի տեղեկացրել: Դաշինքի գլխավոր քարտուղար Յենս Ստոլտենբերգն ավելի ուշ ասել է, որ որոշումը «կապված չէ որևէ կոնկրետ իրադարձության հետ»:
