Լևոն Յոլյանը 2017 թվականի փետրվարի 28-ին ՀՀ Ազգային ժողովի ԱԺՈ-222-Ա որոշմամբ նշանակվել է Վերահսկիչ պալատի նախագահ: Այնուհետև, Սահմանադրությունում փոփոխություններ կատարելուց և «Հաշվեքննիչ պալատի մասին» ՀՀ օրենքն ուժի մեջ մտնելուց հետո, 2018 թվականի ապրիլի 9-ին Վերահսկիչ պալատը դադարել է գոյություն ունենալ (առկա է պետական ռեգիստրի համապատասխան տեղեկանք) և ստեղծվել է նոր պետական մարմին` ՀՀ հաշվեքննիչ պալատը:
Սահմանադրության փոփոխությունների 220-րդ հոդվածը սահմանում է, որ Վերահսկիչ պալատի անդամները շարունակում են պաշտոնավարել որպես Հաշվեքննիչ պալատի անդամներ: Իսկ «Վերահսկիչ պալատի մասին» ՀՀ օրենքի 10-րդ հոդվածի 1-ին մասի համաձայն, Վերահսկիչ պալատի նախագահը համարվում էր Վերահսկիչ պալատի խորհրդի անդամ: Հետևաբար, ստացվում է, որ ՀՀ Սահմանադրության 220-րդ հոդվածի իմպերատիվ պահանջներով Լ. Յոլյանը պետք է Հաշվեքննիչ պալատում շարունակեր պաշտոնավարել ոչ թե որպես նախագահ, այլ՝ որպես պալատի անդամ:
Ավելին, հարց է առաջանում, թե նշված իրավակարգավորումների ներքո ինչո՞ւ է հենց Լևոն Յոլյանը շարունակում պաշտոնավարել որպես Հաշվեքննիչ պալատի նախագահ, այլ ոչ թե Վերահսկիչ պալատի խորհրդի անդամներից Սահմանադրության 220-րդ հոդվածի ուժով Հաշվեքննիչ պալատի անդամ դարձած մեկ այլ անձ… Հավելեմ, որ գոյություն չունի որևէ իրավական ակտ, որով նախատեսված է Վերահսկիչ պալատի նախագահի որպես Հաշվեքննիչ պալատի նախագահ պաշտոնավարումը շարունակելու գործընթաց, իսկ Սահմանադրության 220-րդ հոդվածը որևէ կերպ չի վերաբերում պալատի նախագահին, այլ` վերաբերում է միայն պալատի անդամներին:
Ուստի, ՀՀ հաշվեքննիչ պալատի նախագահի պաշտոնը դե յուրե թափուր է և Ազգային ժողովում, իրավական առումով, պետք է տեղի ունենա Հաշվեքննիչ պալատի նախագահի ընտրություն՝ «Հաշվեքննիչ պալատի մասին» ՀՀ օրենքի մասնավորապես 17-րդ հոդվածի և «Ազգային ժողովի կանոնակարգ» ՀՀ սահմանադրական օրենքի իմպերատիվ պահանջներին համապատասխան:
Ներկայումս մեկնարկել է ՀՀ հաշվեքննիչ պալատի հերթական անդամի ընտրության համար ՀՀ Ազգային ժողովի խմբակցությունների կողմից թեկնածություններ առաջադրելու գործընթացը, իսկ հիմք ընդունելով վերը նշված հիմնավորումները՝ Ազգային ժողովում իրավաբանորեն պետք է տեղի ունենա միանգամից Հաշվեքննիչ պալատի լեգիտիմ նախագահի ընտրություն, ով օրենքի ուժով կլինի նաև Հաշվեքննիչ պալատի յոթ անդամներից մեկը: Իսկ Լ. Յոլյանը, կրկին անգամ հիմք ընդունելով վերը նշված հիմնավորումները, կարող է շարունակել պաշտոնավարել որպես ՀՀ հաշվեքննիչ պալատի անդամ:
Ուստի, ի կատարումն ՀՀ Սահմանադրության պահանջի, անհրաժեշտ է նշվածի առնչությամբ ձեռնարկել համապատասխան միջոցներ, ինչպես նաև խնդիրը քննարկել Ազգային ժողովի ֆինանսավարկային և բյուջետային հարցերի մշտական հանձնաժողովում և խորհրդարանական խմբակցությունում` ՀՀ հաշվեքննիչ պալատի լեգիտիմ նախագահի ընտրություն կազմակերպելու և իրականացնելու նպատակով:
Միաժամանակ, սույնով իրազեկում եմ, որ այդ կապակցությամբ մեր փաստաբանական խումբը նախաձեռնել է Հայցադիմում ներկայացնել Հայաստանի Հանրապետության վարչական դատարան` ՀՀ Ազգային ժողովին, մասնավորապես` Ֆինանսավարկային և բյուջետային հարցերի մշտական հանձնաժողովին, իրավական ակտերով ամրագրված համապատասխան գործողությունների կատարումը ՀՀ վարչական դատավարության 68-րդ հոդվածի 1-ին մասով պարտավորեցնելու պահանջով:
ՀՀ փաստաբանների պալատի փաստաբան Հակոբ Ջհանգիրյան